Casi 18 mil number di auto no tin impuesto paga ariba dje pa 2018

ORANJESTAD - Tin un total di 17.759 plachi di number di auto no paga pa 2018 ainda, cu ta traduci den un suma di 1.6 miyon florin. Asina minister di Finanza Xiomara Ruiz Maduro a splica durante su conferencia dialuna mainta. E remarke tabata cu e colegio di supervision financiero CAFT ta menciona esaki den su reaccion di siman pasa di e rapport di mitar aña di gobierno. Loke esaki ta nifica ta cu pais Aruba a cay atras 1.6 miyon na entrada riba e tereno aki. 

COBRA BOET

E forma con ta bay resolve e asunto aki ta entre otro, pa cobra esnan cu no a paga ainda, un multa riba e suma cu nan debe, cu ta mitar di e suma total. Esnan cu debe ainda (24% di e totalidad) lo haya un cobransa na nan cas y lo tin cu paga esaki consecuentemente despues y cu un suma extra. A sigura cu e cambio aki no ta algo cu gobierno actual a bin cu ne, sino ta algo di gobierno anterior, pero cu nunca no a keda ehecuta. E gobierno actual a opta awor pa haci e cobransa awor si.