Victima di accidente fatal di trafico na Pos Chikito identifica

POS CHIKITO - E victima di e accidente di trafico fatal na Pos Chikito diadomingo anochi a keda identifica. Vocero suplemente di polis Liliana Rasmijn a confirma cu pa 21:36 central di polis a haya un yamada cu un auto lo mester a alcansa un peaton na altura di Irian Restaurant na Pos Chikito. Na yegada di patruya ta bin topa cu e victima riba caminda y un hyundia accent numera A-4690. Ta pidi pa ambulance urgentemente mirando e gravedad di e peaton. Ambulance a yega na e sitio di e susedido y a purba re-anime pero lamentablemente no por a haci nada mas. Pa 22:50 Dr Texiere ta constata morto di Luis Carlos Neblies naci 30-7-1964 na Colombia. Na e sitio a presenta specialista di trafico, BFTO y slachtofferhulp. Fiscal a laga tuma e curpa di e victima den beslag. E auto tambe a wordo tuma den beslag pa mas investigacion. Ambulance a bay cu e dama chauffeur di e auto hospital pe haya tratamento medico mirando cu e la keda den shock. E caso ta bao investigacion.