CAFT: Aruba tin cu tuma paso pa logra reduci gasto di personal pa 2018

ORANJESTAD - Gobierno di Aruba no ta cumpli cu e norma di LAFT, pa loke ta e presupuesto 2018. Asina e presidente di e colegio di supervision financiero di Aruba CAFT, Raymond Gradus ta bisa den su reaccion di e raportahe di mitar aña financiero di pais Aruba. Manera palabra, gobierno di Aruba tin cu presenta un rapport financiero di cada cuartal di aña, y entrega esaki na CAFT. Aki ta mira si enberdad gobierno ta cumpliendo cu e plan financiero segun e presupuesto di e aña. Dia 9 di augustus ultimo, gobierno a entrega e rapport di e di dos cuartal, y e siman aki (23 di augustus 2018), CAFT a publica esaki. No tur cos ta malo segun e reaccion di CAFT, y ta mustra unda cu a haci mehoracion tambe. E problema di personal sinembargo ta keda un preocupacion pa cual gobierno mester sigui haci su trabou. 

NORMA NOBO

Un biaha mas, CAFT ta advisa pa stipula un norma nobo legal pa e periodo 2018-2021. E plan ta cu mester reduci e gastonan di personal cu 12.2 miyon florin. Y CAFT ta nota cu gobierno ainda mester tuma e pasonan necesario pa por realisa e reduccion pa fin di e aña aki ainda. CAFT ta sigui mustra cu e efectonan di e reduccion riba gasto di personal den 2018 mester ta visibel den e raportahe di e di 3 y 4 cuartal di e aña aki. Lesa e reaccion completo AKI.