De Veer Chain Theatre mester bandona Paseo Herencia otro luna

ORANJESTAD - The Cinemas (De Veer Chain Theatre) mester desaloha di Paseo Herencia pa dia 15 di september proximo. Asina huez a dicta recientemente den un caso sumario entama pa doño di e centro comercial na Palm Beach, esta Paseo Herencia. Un disputa entre e doñonan di e edificio (Heritage Development Company NV) y The Cinemas riba e contract a pone cu e doño a hiba The Cinema corte pa haya claridad. Y huez a duna e doño razon den e caso aki. The Cinemas mientrastanto a haya un opcion pa un tereno pa traha nan propio sala di cinema den e area proximamente, cu mester keda cla mas tarda fin di otro aña. 

E CASO

E caso ta mustra cu entre e doño y The Cinemas tin un contracto for di 2004, y cu aña pasa a yega na un acuerdo pa prolonga e contracto pa un periodo mas largo te maart 2019. Pero mintras tanto Paseo Herencia a busca un otro compania pa huur e localidad esta Caribbean Cinemas aplicando asina e regla di 90 dia di aviso di salida. The Cineams no tin problema cu e clausula di 90 dia, sino ta cuestiona si e hurdo 'nobo' cu e doñonan kier presenta pa drenta Paseo. 

CONTRACTO

Den corte a presenta e contracto entre e doño di e edificio y The Cinemas, cu ta bisa cu pa por termina e contracto prome cu tempo, mester papia di un partido bona fide, y cu mester duna un termino di 90 dia. E definicion di 'bona fide' no a keda defini den corte pero ta compronde cu ta trata di un partido 'serio'. Sinembargo aki ta unda cu The Cinemas tin problema, pasobra e no ta considera e cliente nobo como un 'cliente bona fide'. Huez den corte no a discuti e forza financiero di e partido aki y corte ta sali di punto di salida cu e partido 'nobo' por carga e peso di e acuerdo (di drenta un acuerdo pa 10 aña cu doño di e edificio). Huez ta conclui na final, cu e partidonan a cumpli cu tur e rekisitonan y como tal no ta mira problema pa otorga e peticion di e partido demandante, cu ta nifica cu pa 15 di september 2018, Cinemas tin cu bandona e edificio definitivamente. Lesa e veredicto AKI.