Warda Costa a asisti boto 'Fish Kraze' den problema riba laman

ORANJESTAD - Ayera atardi banda di 14:05 or stacion di Warda Costa na Aruba a hanja informacion di RCC pa un Search and Rescue (SAR) suit di Aruba. Un boto tabata den peliger. E team di Warda Costa a sali mes ora pa bai busca e boto basá riba e posicion cu RCC a duna nan. Banda di 15:28 a bin hanja e boto ‘FISH KRAZE’ cu tabata 3 miya suit di cabes di Aruba. E motor di e boto tabata daña. Warda Costa a cuminsa tou e boto bin tera cu né pa hibele Commandeursbaai..

Capitan a declara cu for di 8:00 di mainta nan a sali for di waf pa bay cu e boto cu nan a cumpra, Bonaire. Banda di 11 :00 or ora cu nan tabata 16 miya zuid di cabes di aruba, e motor a paga cu nan y no kier a sende mas. Segun e capitan e VHF no tabata traha pa motibo cu e no a instala esaki.  Dor ku e boto a keda drif bin abou bek e a logra hanja un tiki señal ku su telefon ku e por a yama su casá  anto splica e situacion. E casá a tuma contacto ku  e medionan di asistencia. E capitan hunto cu e otro persona cu tabata abordo a keda masha contento y aliviá ku e presencia di Warda Costa. Warda Costa semper tey pa yuda pero tin ku soru ku no ta bai laman sin medio di comunicacion of ku no ta traha.