Sentencia contra mama di Rishandro y Eugene aki tres siman

ORANJESTAD - E continuacion di e tratamento di e caso Speeltuin diabierna merdia -, cu a dura apenas un ora-,  unda cu e mama di e dos criaturanan Rishandroh y Eugene tabata na turno, a bira un discusion leve entre abogado vd Biezen di e sospechoso R. Frans y fiscal Gerritsen, riba rapport di experto. Y ta netamente esaki tabata e motibo na juni cu huez a pospone e parti aki ya cu tabatin discrepancia entre rapport di psicologo y psiciatra. Huez a apunta un psiciatra extra for di Corsou pa e session di diabierna, pero esey no a resolve e asunto. Na discusion ta, si e sospechoso ta mas un victima of un sospechoso y con pa sentencie a base di esaki. Huez ta dicta sentencia dia 14 di september pa 8:15am.

FISCAL

E caso di diabierna a sigui unda cu el a stop na juni, esta cu e rapport di psicologo y psiciatra. E diferencia ta cu awor tin 3 rapport, di cual uno ta di un psiciatra di Corsou. Fiscal Gerritsen su interpretacion di e rapport ta diferencia di esun di e abogado di e sospechoso. Segun Fiscal, tur sospechoso mester wordo teni responsabel pa nan actonan, a lo menos cu tin un motibo hopi 'urgente cu tin cu desvia di esaki. Un ehempel por ta un estado di psicosis, pero hasta aki, tin cu determina e estado di psicosis. Pero segun Gerritsen, no por determina esaki den e rapport. No sa si e sospechoso a bira asina durante e situacionan violento cu su pareha y e muchanan, of ta despues di esey, el a cuminsa experencia e simptomanan. Un di e rapportnan ta etica e sospechoso di ta sufri di e sindromo di muher bati (battered woman syndrome), pero den mesun rosea ta bisa cu esey no ta un malesa. Tambe e fiscal ta puntra si e sospechoso a haye den un estado di superioridad psicocologico pa cual e no por a fungi corecto y pidi pa ayudo ora cu su mes y e yiunan tabata den peliger pa nan bida. Fiscal a mustra cu si e sospechoso por a sali for di cas, bay trabou, e mester por a busca ayudo, pero no a haci esaki. Ta bon pa determina con fuerte e presion di afo ta, aunke tin motibo pa pensa cu no obstante tur e informacion, fiscal ta pensa cu e sospechoso por maneha su mes bon, y ta responsabel parcialmente pa su actonan. E interpretacion di e ultimo psiciatra di Corsou, su palabranan tabata 'mal usa', lamentablemente cu ta bay na fabor di e sospechoso, unda cu ta bisa cu no por tene e sospechoso responsabel pa cierto actonan. Y ta aki cu e fiscal ta diferencia di opinion cu e abogado. Teniendo cuenta cu e circumstancia, fiscal ta sigui pensa cu e sospechoso ta culpabel, pero mirando e hecho cu e mes (pues e sospechoso) ta un victima, y a perde su dos yiunan, ta pone cu e castigo impone, lo ta uno reduci, cu si e no tabatin e puntonan ey pa atende cu ne. Como tal a mantene e peticion pa condena, conforme e ultimo tratamento cu ta  un castigo di prison di 4 aña, di cual 1 aña ta condicional.

DEFENSA

E defensa di abogado vd Biezen no tabata uno largo, pero si suficiente pa determina mesora cu e ta diferencia di opinion cu e fiscal. Vd Biezen ta interpreta e rapport di e ultimo psiciatra totalmente na fabor di su cliente, cu a determina definitivamente cu e ta un victima di e situacion, algo cu segun e abogado, e psiciatra ta ripiti varios biaha den e rapport. Como tal, no por tene su cliente responsabel pa e morto di e criaturanan, y mester wordo mira como un victima. Como tal e castigo pidi, no ta cuadra. A mustra te hasta cu ta parse cu e fiscal kier sinta riba stul di e psiciatra, algo cu e fiscal a purba deshaci di dje mesora. Y finalmente, contrario na pensamento di fiscal, segun e abogado, e rapportnan ta cuadra bon cu otro y ningun momento e psiciatra a 'mal usa' un palabra of interpretacion manera cu e fiscal ta bisa. Den un comentario despues pa e portal aki, e abogado un biaha mas a confirma esaki. Huez lo dicta sentencia dia 14 di september 2018 pa  8:15am.