Grafiti riba muraya di DIMAS pa alerta riba trahadonan ilegal

ORANJESTAD - Un mensahe di grafiti pa alerta autoridad di trahadonan ilegal na Aruba a aparece diabierna mainta riba muraya di edificio di DIMAS. Polis ta investigando ken ta e culpable, segun directora di Dimas Kathy Paskel na NoticiaCla. Un mensahe cu a aparece algun dia atras riba e Facebook page di dept di migracion, tabata bisa pa manda tips si conoce trahadonan ilegal trahando y of bibando na Aruba. E mensahe tabata uno valido, pero ya no ta aparece mas riba e pagina. NoticiaCla a wordo bisa pa check cu oficina di minister pa un clarificacion pakico a kita e mensahe aki. No ta conoci si ta esaki ta un resultado 'indirecto' di e grafiti aki. 

E CASO

Bek pa e caso, segun Paskel, mainta nan a bin haya un mensahe cu grafiti riba e muraya parti pariba di e edificio. E mensahe tabata bisa 'Na Marriott tin 30 mexicano trahando sin papel, boso ta drumi', y un otro mensahe bisando 'RIP Ski', e adicto ambulante cu e siman aki a fayece. Segun Paskel, e mensahe aki ta dirigi na e departamento cu ta encarga cu esnan indocumenta, y ta lamenta cu ta daña propiedad di gobierno asina. A confirma cu a haci denuncia contra esaki awe mainta caba. Ta bay check e cameranan pa wak ken a haci esaki y ki ora esaki a sosode. Mientrastanto personal di mantenimento di DIP tabata na caminda pa kita e grafiti di e edificio. 

TIPS PA MIGRACION

Tabata algun dia pasa cu un aviso a aparece riba Facebook cu tabata un mensahe pa 'yuda nos controla' y e mensahe tabata bisa cu 'si bo sa unda tin hendenan ilegal ta traha y biba, manda nos un mensahe riba e page di migracion'. E mensahe aki a keda comparti riba un otro pagina, y a hala atencion. NoticiaCla a mira e mesun mensahe riba e pagina di migracion, pero ya e mensahe aki no ta aparece mas riba e pagina aki. For di e departamento a wordo bisa pa tuma contacto cu oficina di minister pa un clarificacion di e mensahe aki.