Ruiz-Maduro: Caso sumario a trece claridad riba motibonan pa tin welga

ORANJESTAD - No ta cuestion ken a gana of perde ora cu tin intrankilidad na Aruba. Asina minister di Finanza Xiomara Ruiz Maduro a bisa reaccionando riba e caso sumario cu gobierno a entama diahuebs mainta. Huez a dicta sentencia mesora y a prohibi e sindicato di douane SADA pa welga riba e tema di rooster (schedule di trabou). 

CLARIDAD

E mandatario ta satisfecho cu e sentencia di awe mainta y el a haya cu huez tabata cla riba e motibo pa por welga of no. Esey tabata de hecho un di e motibonan principal pa e caso. Huez a bisa claramente durante e caso cu un welga por wordo usa solamente como instrumento ora cu tin conflicto laboral. 

INSPRAAK

E keho cu e sindicato tabatin cu e mandatario no tabata dispuesto pa duna nan un 'inspraak', no ta cuadra. E ta mustra cu constantemente tabatin un consehero fiho cu tabata informa y papia, y tabatin momentonan suficiente pa por a haci esaki. Berdad ta si, cu tin un hirarchia cu mester respeta y cu tin biaha no tur ora ta wordo respeta. Ta ora cu tin conflictonan grandi, ta ora cu un mandatario ta cay aden. "Claro, semper un mandatario lo tey pa yuda, pero mester respeta cu tin e hefenan" Maduro a bisa. 

TIN CIFRA?

A mustra cu debidamente tabatin cifra, y cu esaki a wordo duna pero si pa un of otro motibo e sindicato no a haya e cifranan, esaki por wordo manda pa nan sin ningun problema. Na tur e mandatario tabata satisfecho cu e curso di e caso y cu a haya mas claridad riba e situacion y ta spera cu tur hende awor tambe sa kico tin cu haci ki ora. Segun Maduro, na final di dia ta un Aruba tin y tur hende mester sa con pa anda cu esaki.