Reunion cu ehecutivonan di CITGO a bay bon pero sin nada nobo

ORANJESTAD - E reunion entre gobierno di Aruba y e ehecutivonan di Citgo di Merca y hefe di PDVSA a bay den bon ambiente, pero nada nobo no a bin dilanti. Asina minister presidente Evelyn Wever Croes a bisa NoticiaCla den forma di primicia diahuebs atardi laat. E unico cos diferente ta cu a topa cu e hefe grandi di CITGO Petroleum Asdrubal Chavez, y e hefe grandi di PDVSA cu ta alavez minister di energia di Venezuela Manuel Quevedo, y Luis Marquez, CEO y general manager di CITGO Aruba, hunto cu consul di Venezuela. 

PILAR Y REHEN Wever a splica e aspecto di tene un isla rehen y cu petrolio ta sigui ta un pilar grandi y como tal no por sigui asina. E tabata kier claridad, y aki e ehecutivonan a duna disculpa pa con cos a bay y cu sanccion di OFAC ta dificulta nan pa nan aspecto financiero. Pero nan ta comprometi cu e inversion pa Aruba y lo sigui cu esaki. "Dentro di un luna nan ta duna nos un update di con lo sali for di e problema aki" Wever a sigui bisa.