Amsterdam a ricibi studiantenan di Aruba

DEN HAAG\AMSTERDAM - Den stadhuis di Amsterdam a tuma lugar awe diahuebs merdia 23 di augustus un recepcion pa e studiantenan di Curaçao, Boneiro, St. Maarten, St. Eustatius y Aruba. Na stadhuis di Amsterdam loco burgemeester Rutger Groot Wassink a yama tur e studiantenan bon bini.

E recepcion a conta cu presencia di Minister Plenipotenciario Guillfred Besaril kende a wordo ricibi pa loco burgemeester Rutger Groot Wassink na su yegada na stadhuis di Amsterdam. Tambe presente tabata director a.i. di Arubahuis mr. Glenn Ling, coordinador di departamento di Enseñansa di Arubahuis James van der Linde y e mentornan pa Amsterdam Edy Ranada y Lourdes Bramble-Tromp.

Den su discurso na e studiantenan sr. Wassink a bisa di ta contento cu e studiantenan a scohe pa bin biba y studia na Amsterdam. E politico a papia di su temporada como studiante y bisa e grupo di studiante cu nan mester trata na haci Amsterdam nan segundo hogar. ‘Aunke cu boso encontra periodonan dificil den boso estudio, keda tene confiansa den bo mes. Tambe corda pa busca sosten na e instancianan ora cu cosnan no ta bai bon’

‘Desde añanan 50 hobennan di Antia y Aruba a bin Hulanda pa sigi un estudio avansa. Amsterdam ta un ciudad cu conoce hopi diversidad den su poblacion. Esaki ta e forsa di Amsterdam. Purba na busca boso mesun caminda den Amsterdam y asina boso por bira mas “Amsterdammer”. Goza di tur loke Amsterdam tin di brinda y hopi exito cu boso estudio,’ asina sr. Wassink a bisa. 

Minister Besaril a acentua na e ocacion aki e combersacionnan cu e ta hibando cu diferente Hogeschoolnan y Universidad na Hulanda pa pidi atencion di nan pa tene cuenta cu e diversidad di nos studiantenan y pa duna nan mas espacio y sosten unda mester. 

E programa a continua na unda Tanya Fraai a entrevista diferente studiante tocante nan estudio, e razon pa a scohe pa bin studia na Amsterdam y otro topiconan interesante.  E studiante Ray Maaten a tena un discurso den cual ela conta a base di su mesun experencia con e bida di studiante na Hulanda ta. Na final e studiantenan a participa na un quiz pa mira con bon nan conocimento di Amsterdam ta. Despues a sigi un introduccion di diferente instancianan cu ta di importancia pa e studiantenan. Minister Plenipotenciario Guillfred Besaril a felicita y gradici Amsterdam pa ta organisa e evento aki pa nos studiantenan. Esaki ta di ocho aña cu Gemeente di Amsterdam ta organisa e recepcion aki pa e grupo nobo di studiantenan di e parti Caribense di Reino Hulandes.