Minister ta lamenta critica di rapport Hulandes riba KIA

ORANJESTAD - "E circumstancianan di Korrectie Instituut Aruba (KIA) no a mehora compara cu un aña pasa. Cu esaki e ehecucion di e plan di mehoracion di 2016 a para". Asina e rapport emiti  diahuebs (awe) na Hulanda pa e grupo di inspeccion Hulandes di Husticia ta bisa.  Minister di Husticia di Aruba Andin Bikker mesora a refuta e contenido, bisando cu e 'ta lamenta cu e Inspeccion Hulandes pa Husticia no a tuma nota di e plan di maneho cu ta para den presupuesto 2018 den cual ta poni e intencion pa construi un KIA nobo'.  

KEHO

Entre e comentario Hulandes, e rapport ta papia di mehoracion riba tereno di vivienda, actividadnan diario y maneho di personal. E estado di e celnan ta inferior, e loke ta ofrece na actividad ta hopi limita, y e presion riba personal ta hopi halto, debi na e falta di reorganisacion. 

REACCION BIKKER

Segun Bikker, e rapport ta referi na e periodo di mei 2017 pa mei 2018, pues ta solamente un periodo di 6 luna ta regarda e gabinete nobo. "Ta iracional pa kere cu den un tempo asina cortico por resolve situacionan cu ta data for di prome cu 2014, special si mira e situacion financiero cu e gobierno anterior a laga pais Aruba aden. Ta for di prome 2014 e instancia concerni a mustra cu e situacion na KIA no ta optimal" e mandatario a sigui bisa. 

REORGANISACION

Pa loke ta e parti di reorganiacion, Bikker den su reaccion ta sigu ibisa cu e ta diligentemente 'bezig' cu e proceso di reorganisacion y construccion di un KIA nobo y actualmente esey ta den periodo di transicion. " Ministerio di Husticia ta di opinion cu ta na mei 2019 por haci un evaluacion di e progreso bou maneho di e actual gabinete, mirando cu e rapport aki a wordo traha referiendo na un periodo di transicion y retonan hereda di e gobierno anterior". Por lesa e rapport completo Hulandes AKI.