SADA: Gobierno ta usa cifra incorecto y sindicato kier participacion

ORANJESTAD - Sindicato SADA (representando douaneronan na Aruba) den e caso sumario diahuebs cu gobierno a entama contra nan, a argumenta cu gobierno no kier duna nan participacion den tumamento di desicion y no ta duna nan e respet necesario. Mirando e situacion, a opta pa bay welga, y asina nan a haya atencion. Abogado pa SADA Peter Mohamed a mustra cu no ta prome biaha cu e topico aki a bin dilanti, sino ya na 2011 y 2015 y ambos biaha sindicato SADA a convence gobierno pa para e intento pa elimina e rooster en cuestion. 

PRESION

Segun Mohamed, na 2011 y 2015 ora cu gobiernonan di e tempo ey kier a introduci e cambio di rooster, a mustra cu no tabata necesario, y a pone presion riba nan, a welga y aki e gobiernonan (lesa:minister) di e tempo ey a acepta y no a elimina e warda ey, esta warda 'A', )12-7). A mustra cu e rooster debidamente ta un aspecto laboral pasobra e ta toca un circumstancia di e trahado. 

PARTICIPACION DI SINDICATO

E abogado a mustra cu no ta manera cu gobierno ta bisa cu sindicato kier goberna hunto cu nan. "SADA no kier goberna hunto cu gobierno ", e abogado a argumenta. Loke nan kier ta pa nan haya participacion enbez di simplemente wordo informa di cosnan cu ta sosode. Ademas, gobierno su argumento pa elimina e warda di marduga no ta cuadra pasobra a presenta cifra no corecto. Tambe, a priminti e sindicato pa duna nan cifra pero esaki no a sosode (ainda den corte no a ricibi nada). 

DAÑO

Contrario na e supuesto daño cu gobierno ta insinua cu lo tin, esaki no ta berdad segun e sindicato. Loke cu sindicato kier, ta pa tin dialogo, sinta na mesa, e ora no tin mas welga. Cifranan cu a keda presenta den un conferencia di gobierno, tampoco no ta cuadra pasobra calculacion presenta (manera nan a relata un dia anterior caba) ta hopi mas cu e loke cu gobierno kier papia di dje. Gobierno ta persisti cu ta bay scapa 600 mil florin pa aña si elimina e warda di marduga mientras cu e cifra di e warda ey ta mucho menos y ta calcula na 40 mil florin pa aña segun e sindicato.