Kock: Sindicato SADA kier goberna hunto cu gobierno

ORANJESTAD - Sindicato SADA kier goberna hunto cu gobierno. Asina abogado David Kock, den representacion di gobierno a argumenta den e caso sumario di gobierno contra sindicato di douane SADA. Kock y Bryson (pa respectivamente gobierno y e gremio comercial ATIA), a presenta nan argumento pakico SADA mester para e welganan. Kock a inicia su defensa, bayendo riba e plan financiero di gobierno cu ta pone cu no tin otro forma sino di 'hala faja mara', mirando e situacion precario cu gobierno ta aden. A bay atras te na 2015 ora cu gobierno Hulandes y Aruba a bay di acuerdo pa  yega na un presupuesto balansa y un situacion financiero duradero. 

SITUACION FINANCIERO

Mas actual, a papia riba e parti di e situacion di 2018 unda cu gobierno actual a presenta e asina yama Financieel Economisch Memorandum den cual ta specifica entre otro e reduccion di gasto di personal. Den cuadro di esaki, Dept di Recurso Humano a yuda traha un plan pa reduci gastonan di personal manera overtime y cierto wardanan. Aki ta unda cu douane ta cay aden y cu despues di varios reunion, a deduci y informa e sindicato cu entrante 1 di september, ta bay reduci un warda (e warda 'A', cu ta di mei anochi pa 7'or di mainta), cu por reduci 600 mil florin pa aña, cumpliendo asina cu e palabracion haci cu Hulanda. 

GOBERNA CU GOBIERNO

Pa loke ta e consecuencia di e welga, e abogado a yama e efectonan 'di consecuencia hopi serio', y cu ta parse cu e sindicato kier 'goberna hunto cu gobierno'. "E sindicato ta welgando pa algo cu no ta regarda nan (competencia)" e abogado a finalisa bisando. A pidi huez na final pa prohibi e sindicato di welga riba e tema aki.