Comision Accion Nacional a convoca ‘reunion nacional’ pa diaranson awor

ORANJESTAD – Comision Accion Nacional (CAN) a convoca un ‘reunion nacional’ pa diaranson awor. Esaki ta e decision cu a cay durante un reunion di e comision diadomingo anochi, segun su lider Hendrik Tevreden a confirma na NoticiaCla.com algun rato despues di e reunion ey. Detayes ta keda pendiente, pero esaki ta e reaccion directo riba e contesta di gobierno, cu no ta revoca e aumento di tarifa di coriente. Un otro medio a yama e accion menciona aki, como un ‘otro manifestacion’, pero Tevreden a referi na esaki como un ‘reunion nacional’. E la keda di suministra mas informacion den curso di diadomingo anochi.

Tabata diahuebs merdia cu gobierno a contesta CAN, cu tanten cu e handling fee di Valero no baha, no por reduci e tarifa di coriente. Despues di e reunion cu gobierno siman pasa, dialuna ultimo CAN a duna gobierno ultimatum te diaranson ultimo, cu despues a keda prolonga te diabierna ultimo. Minister Otmar Oduber a confirma na NoticiaCla.com diabierna mainta cu for di diahuebs a cumpli cu e ultimatum (aunke gobierno inicialmente no tabata na altura di ningun ultimatum).

E contesta pues no tabata positivo mirando cu a bisa cu e contesta principal, ta cu no por cumpli cu e peticion di revoca e aumento di tarifa di coriente manera pidi. Hunto cu e contesta, a manda un cantidad di documento di tanto Elmar y WEB pa por hustifica e contesta cu nan a duna. “Tanten cu e handling fee di Valero ta existi, e prijs dificilmente lo por varia di loke e ta aworaki conforme ahustacion haci” Oduber a bisa. Mes momento sinembargo, gobierno a manda un carta pa Valero, cu combersacionnan lo continua pa wak si por reduci of elimina e handling fee mas cu ta posibel. Na momento cu esey tuma lugar, lo ahusta e tarifa di coriente” Oduber. Awor ta keda na CAN pa wak kico ta nan siguiente paso. Segun Oduber, no ta na altura cu nan tin cu bin bek na otro.

Comision Accion Nacional a protesta dos siman pasa den un forma di manifestacion, cu e meta pa pidi gobierno e.o. pa kita e aumento di tarifa di coriente. Na final a entrega un manifiesto, cu e peticion aki. A reuni despues cu gobierno y a keda di bin bek pa duna un contesta final. E contesta final pues ta cu, tanten e handling fee di Valero keda manera cu e ta, no tin reduccion di tarifa di coriente.