Huez: Sindicato SADA no por welga pa haya afspraak cu minister

ORANJESTAD - Sindicato di douane, esta sindicato SADA a bay di acuerdo cu huez diahuebs mainta pa no welga mas pa e tema di horario di trabou, osea e 'werkrooster'. Durante e caso sumario entama pa gobierno di Aruba (lesa: minister di Finanza Xiomara Ruiz Maduro)contra e sindicato, gobierno a splica su puntonan pakico ta pertinente pa e modus operandi di SADA pa yama accion cada bez y awor riba e tema di rooster, mientras cu SADA a bringa e ponencianan aki argumentando cu gobierno no ta duna e sindicato espacio pa negocia, y no ta dune e respet necesario. Na final huez a dicta sentencia mesora, halando atencion di e sindicato cu no por usa un welga djis pa haya atencion di e minister pa un reunion. 

HUEZ

Despues di a tende ambos partido (gobierno y sindicato), huez a cuestiona e sindicato su forma di usa welga y a cuestiona si enberdad un sindicato por usa e vehiculo aki pa un meta otro cu pa bringa un asunto laboral.  "Ora cu mi a haya e documentonan delanta, no tabata mucho sigur pakico e welga tabata. Mi tabata bou di e impresion cu e tabata pa algo laboral" e huez a cuminsa bisa. "Pero awor ta cla pakico sindicato ta usando e instrumento aki". Djey el a dirigi su mes na e presidente di SADA, bisando esaki cu sindicato no por usa welga pa hala atencion di un gobierno y of pa pidi pa respeta e sindicato. "Bo no por usa un welga pa esey. Bo ta compronde esey?" e huez a bisa e presidente Eduard Maduro. Despues a el a puntra e abogado di e sindicato, si nan por garantisa cu nan lo no welga mas riba e tema aki, riba cual e abogado a bay di acuerdo. Huez a dicidi mesora cu esey ta bira su sentencia, mirando cu partidonan ta di acuerdo y lo traha un procesverbaal pa esaki. Lesa e procesverbaal AKI.