SADA: Shift marduga na airport ta 40 mil pa aña y no 600 mil

ORANJESTAD - Contrario na informacion di minister encarga cu douane Xiomara Ruiz Maduro, e warda di marduga di douane na aeropuerto ta costa apenas 40 mil florin pa aña y no casi 600 mil florin. Presidente di sindicato di douane Eduard Maduro a presenta un documento den un conferencia di prensa diaranson atardi, indicando cu pa 6 luna, e warda ta costa 20 mil florin so, pues pa un aña, den careda di 40 mil. E no sa unda e mandatario a saca e 600 mil florin cu 'lo scapa' pa aña si elimina e warda ey. E mandatario a bisa dialuna cu entrante 1 di september lo elimina e warda ey caba. 

CIFRAS INCORECTO

Maduro(SADA) a bisa cu e sindicato a haci nan trabou, analisando tur e weekroosters (e schedule di trabou di douane) pa wak unda e problema ta. Y nan no por a compronde e pensamento y informacion di minister. Despues den nan 'box' nan a haya un breakdown di e loke ta e gastonan di e shiftnan. Aki a bin sali na cla cu e suma cu ta costa pa 6 luna pa tur shift di douane na aeropuerto, ta 191 mil florin. Pues pa aña por duplica e suma cu ta yega mas of menos 400 mil florin pa tur shift. E mandatario, segun SADA, ta bisa cu solamente e shift di marduga, ta costa gobierno algo di 600 mil florin. Algo cu nunca por ta posibel si tur shift hunto ta costa 200 mil menos. "Sea e minister no ta bon informa, of no kier compronde e asunto", Maduro a bisa. 

TRAHADONAN STUDIANTE

Ademas Maduro (SADA) a bisa cu e ta haya un falta di respet cu minister ta tilda e trahadonan nobo di douane, Hulp Commies, como studiantenan y cu no por yama nan douanero. Dialuna e mandatario a cuestiona e asunto aki, bisando cu tin 13 persona cu ta 'den opleiding' pa bira douanero y cu ya caba sindicato a saca nan for di nan les y pone nan bay welga. A mustra cu e rangenstelsel no ta asina hinca den otro y cu de hecho, nan ta douaneronan y mester duna nan e respet como tal. 

E CASO

Maduro (SADA) a bisa tambe cu nan ta bay corte diahuebs mainta 10'or y dilanti huez, bringa nan caso, usando e.o. e informacion presenta awe den e conferencia di prensa, pues riba e cifranan cu lo no ta cuadra segun minister Ruiz Maduro. Huez a prohibi e sindicato pa tene cualkier otro welga tanten cu no tin sentencia di e caso mayan mainta. Potret ta di archivo di accion di SADA na aeropuero 2017.