Diabierna corte ta sigui cu tratamento di caso Speeltuin

ORANJESTAD - Diabierna atardi Corte ta trata e di dos parti di e caso Speeltuin (morto di Rishandroh y Eugene) unda cu huez lo trata specificamente e parti di e mama di e dos criaturanan, Risheila Frans. E prome biaha cu a trata e caso na juni ultimo, huez a haya cu informacion di psiciatra y psicologo no tabata completo y cuadra y a pidi mas analisis y a pone fecha pa trata esaki despues di recess cu ta awor. Despues cu huez trata e caso aki, lo por dicta sentencia pa e mama tambe. E padrastro mientrastanto a keda sentencia prome cu recess y a haya 15 aña prison combina cu tratamento TBS. E caso diabierna ta cuminsa 2'or di atardi.

E CASO 

Huez a habri e caso Speeltuin bek diabierna merdia dia 15 di juni, pa e parti cu ta trata e mama di e criaturanan Rishandroh y Eugene , esta Risheila F. . E motibo manera indica caba, ta cu tabatin mucho inconsistencia den e rapport di e psikiatra y e psicologo. Y tanten tin esey, huez a haya prudente pa habri e caso bek pa trata esaki miho. A sugeri pa apunta un di tres experto, sea ta di Corsou of otro caminda cu no ta Aruba, y laga e duna su analisis di e situacion.