DOW a cera caminda Tanki Flip – Shaba pa asfalta e caminda

ORANJESTAD - Departamento di Obra Publico awe mainta a cera e caminda di Tanki Flip pa Shaba pa raspa y asfalta e caminda. Particularmente  automobilistanan cu ta haci uzo di e caminda entre Oranjestad y Noord for di rotonde Tanki Flip pa T-Kruising di Fermin’s Bar & Restaurant. Esaki a sosode ,awe, diaranson mainta for di 9’or di mainta te 6’or di atardi. DOW ta cera e caminda den ambos direccion pa raspa y asfalta e caminda.

Desviacion ta lo siguiente:

• Desviacion pa trafico den direccion Tanki Flip ta via Bubali, Caya Musica y Boegoeroei.

• Desviacion pa trafico den direccion Noord ta via Cunucu Abao, Caya Musica y Boegoeroei

E trabounan aki lo tin un duracion di 2 siman. Mester menciona cu despues di 6’or di atardi, e caminda lo wordo habri bek pa tur automobilista.

En conexion cu e trabounan menciona Departamento di Obra Publico ta haci un peticion na tur automobilista pa no haci uzo di e camindan menciona y ta pidi pa tene cuenta cu e inconveniencianan cu lo por surgi pa cual DOW ta pidi su disculpa.