Ta deseo di minister pa Aruba conoce aumento di notario di 4 pa 6

ORANJESTAD - Aruba dentro di poco por conoce un aumento den e cantidad di notario. Segun regla, standplaats Aruba por tin 4 notario. Pero segun minister di husticia Andin Bikker, esaki por cambia pa asina yuda nos economia y proceso di registro di tereno y tambe testamento. E intencion di e mandatario ta pa aumenta e cantidad di notario di 4 pa 6 of te hasta 7. For di 2005 no a actualisa e nota di cambio/regla aki, y na 2013 gobierno anterior tambe a vocifera e intencion pero nunca a yega na cambi'e. Esey por sosode awor. 

AUMENTO

A mustra cu a establece e regla di cantidad di notario, basa riba e poblacion y pa Aruba esaki tabata 4. Pero poblacion a aumenta pero e cantidad di notario no. Entre e beneficionan, por procesa mas traspaso di propiedad y esaki ta alivia tambe e trabou di makelaar pa cu tereno. Ademas e mandatario kier digitaliza e registro pa Aruba mes tin su registro pa testamento. Tur ta trabou cu un notario ta encarga cu ne. Mientras cu un kandidaat notaris por yuda, e trabou mes tin cu wordo haci pa un notario mes, pues aumenta e cantidad di kandidaat, no ta e meta segun Bikker, den un splicacion pa NoticiaCla. No a duna un termino si cu e cambio y aumento pa mas notario lo tuma lugar.