Douaneronan a sigui den accion diamars mainta

ORANJESTAD - E accion di douaneronan na aeropuerto a continua diamars mainta manera anticipa. Presidente di e sindicato cu ta representa e trahadonan douanero, Eduard Maduro di SADA, a bisa NoticiaCla.com cu ta tur douanero ta den accion, y ta topa na aeropuerto. E accion di diamars ta  di 11'or te 3'or y ta pa protesta e decision di gobierno y leiding di douane pa elimina e warda di marduga di 12am- pa 8am. Nan no ta di acuerdo cu e decision ey y como tal a opta pa un di dos dia sigui, bay den accion. No ta conoci kico lo pasa despues di 3'or ya cu esey lo mester a keda dicidi durante e proximo oranan entre e miembronan. Gobierno mientrastanto a informa cu ta hibando e sindicato corte diahuebs mainta relaciona cu e accion aki. 

REACCION

E presidente di SADA a duna algun comentario riba e conferencia di prensa di e mandatario encarga cu e departamento esta Xiomara Ruiz Maduro. Segun Maduro (di SADA), e mandatario no a informa nan di e caso di corte y te ainda nan no a tende nada oficial. E asunto cu ta saca studiantenan di douane for di nan les pa welga, tampoco no ta cuadra segun Maduro. Unabez cu bo drenta douane, bo ta un douanero, pero di e rango mas abou. Pues segun Maduro, e mandatario no ta na altura di e 'rangenstelsel' di douane. Ademas a rechasa e ponencia cu a 'saca' e douaneronan for di nan les pa bay welga. Ta nan mes a opta pa bay ora cu nan a haya un comunicado di SADA manera tur otro miembronan, segun Maduro.