ATIA: Accion di Sada ta causa daño irreparable na comercio y Aruba

ORANJESTAD - ATIA  a tuma nota di e intencion di sindicato di Douane, pa pone paro di trabow (reunion) riba diamars entre 11or di mainta pa 3 or di atardi pa henter e cuerpo di Douane. ATIA na nomber di comercio di Aruba ta condena fuertemente un acccion dirigi pa causa daño maximo na comercio y economia di Aruba.

DERECHO

Segun ATIA, tur sindicato tin derecho pa protesta pa cu un situacion cu nan ta wak como inhusto di indole laboral y den nos democracia, despues cu e proceso di dialogo no duna resultado,  semper tin e caminda di hues pa busca derecho.

DAÑO

Ultimamente e arma di pone trabow abow, y consecuentemente causa e maximo daño na nos isla, ta wordo husa pa cualkier discussion of posicion cu sindicato no ta di acuerdo cune. Comercio a cuminsa ricibi cartanan di companianan cu ta transporta carga, cu e prijs di tur comestibel, entre nan prijs di producto cu ta pertenece na nos canasta basico, lo wordo aumenta drasticamente pa motibo di e gastonan halto asocia cu e servicio y proceso  impredecibel y pa falta di confiansa di e proceso na nos waf. Sindicato ta yama durante ora pico di aeropuerto, tur nan miembronan pa reuni entre 11or di mainta pa 3 or di atardi, asina causando atrobe e maximo daño na nos industria principal, nos turismo.

TOLERANCIA

Ta yega e ora cu no por tolera esnan cu ta labora na institucionan di vital importancia pa nos pais, hunga cu pan di henter un industria y henter un pais. Cu e accion aki, e barco cu ta entrega tur carga for di Miami lo ser stroba atrobe pa baha su carga, y probablemente lo opta pa bai Corsou, causando atrobe un daño irreperable na nos industria turistico, comercio y pueblo di Aruba, pa falta di alimentacion y otro productonan ariba nos isla.

ECONOMIA

Segun ATIA nos ta un economia fragil cu ta depende di nos waf y aeropuerto, e adernan principal di economia di nos pais, cual mester por funciona sin interupcion. SADA cu su accion ta pone e bienestar di pais Aruba un banda y ta laga un conflicto laboral prevalece ariba bienestar general.

CANCELATION FEE

E gremio ta mustra cu Aruba ta ricibiendo ya caba cancelacion for di varios barco cu ta trece container pa Aruba, cu nan lo no bin Aruba mas, y e accionnan aki ta e druppel cu lo hasi e hemchi di pasenshi bai over.

DIALOGO

ATIA ta spera cu pa medio di dialogo y e caminda legal, keda  busca pa sali for di conflicto di indole laboral sin  causa daño na pais Aruba.