Gobierno ta hiba SADA corte pa welga na aeropuerto

ORANJESTAD - Gobierno (lesa: minister di Finanza) ta hiba sindicato di douane SADA corte diahuebs awor. Asina minister encarga cu e departamento di douane, Xiomara Ruiz Maduro a bisa den un conferencia di ultimo ora dialuna merdia. Maduro kier pa huez duna un clarificacion ki ora por welga y ki ora no, pa evita cu cada bez pa cualkier cos, un departamento manera douane protesta, y asina perhudica economia di nos isla. Esaki ta e resultado directo di e accion di dialuna mainta ora cu e douaneronan na aeropuerto a pone trabou abou como protesta cu ta bay elimina e night shift na aeropuerto. 

E SITUACION

Dialuna mainta e trahadonan di douane a protesta e hecho cu gobierno kier elimina e shift di marduga 12am-8am entrante 1 di september awor, pa motibo di gastonan di overtime. Ruiz a splica cu no tabatin ningun necesidad pa bay welga, mirando cu no tin problema cu salario di ningun douanero, ora cu kita e shift. Ningun douanero ta keda sin trabou of ta keda afecta, e mandatario a sigui splica. Ta meramente pa baha gasto di overtime den cuadro di acuerdonan cu Hulanda pa cu presupuesto di gobierno entrante 2019 unda cu a mustra cu por scapa mas di 600 mil florin anualmente. Den e caso aki, e medida ta drenta na vigor 1 di september 2018 caba, y asina ta logra scapa 200 mil florin pa 2018 na overtime. Pa loke ta e warda, no tin problema pasobra aeropuerto no ta funciona den e oranan ey toch ya cu no tin otro departamento cu ta funciona. Si dado caso mes tin buelonan laat of special, lo tin douanero cu lo ta presente pa atende esaki. 

WELGA PA LOCO

E mandatario a mustra cu e tabata sorprendi un poco cu tabatin welga, specialmente pasobra ta siman pasa ainda a reuni cu e sindicato y tur departamento concerni, unda cu a presenta e punto aki tambe. Pues tur hende tabata na altura, pa dialuna bin tende cu tin un welga cu tur chens pa interumpi e fluho di comercio y pasahero na aeropeurto. A mustra cu aworaki, e tipo di actonan aki ta un problema pasobra Aruba mester di tur tipo di entrada cu e por haya, mirando cu Aruba ta draai full riba turismo. Esey ta pone cu gobierno mester tuma paso awor pa evita mas situacionan di welga sin cu ta necesario y djies pasobra douane no tabata di acuerdo cu algo. 

CORTE

Ruiz a bisa e ora cu pa evita futuro welga asina, a dicidi di entama un caso sumario contra SADA, y ta pidi huez specificamente pa clarifica e asunto di welga, pa asina compronde ki ora ta ok pa welga y ki ora no. Ta compronde cu ta un derecho pa welga, pero no ora cu ta welga ki ora cu ta y sigur no ora cu ta perhudica comercio di e estado aki. Segun Ruiz cada bez ora cu algo no ta na gusto di e douaneronan, nan ta welga. Y esaki no por. Y como tal kier haya un claridad di huez riba e asunto di welga. E ta conta awor specifico pa e welga di dialuna, pero e lo funciona tambe y ta un claridad pa futuro welga pendiente cu por afecta comercio. E caso ta poni pa tuma lugar 10'or di mainta diahuebs awor.