Debi na accidente recien, por spera cambio di ley pa uso di ATV y UTV na Aruba

ORANJESTAD - Por spera cambio di reglamento y ley pa loke ta uso di e vehiculonan special conoci como ATV (Quadracer) y  UTV (Buggy) na Aruba. Gobierno di Aruba ta evaluando esaki den cuadro di e accidente recientemente na Malmok unda cu un hobencita a keda seriamente accidenta siendo un pasahero riba e UTV y cu a bay para te na Puerto Rico pa su recuperacion. Minister di husticia Andin Bikker a referi na e accidente, y a bisa cu a pidi conseho huridico na instancia concerni, si mester adapta e reglamentacion pa cu e uso di e vehiculonan aki. E kier sa si e leynan ta adecua pa garantisa seguridad di esun cu opera e vehiculo y e pasaheronan. 

E SUSESO

E mandatario ta usa como punto di salida, e accidente di siman pasa diaranson entre un van y un UTV, ambos maneha pa turista bishitando nos isla, y cu manera indica caba, a laga un damita di 7 aña seriamente lesiona. Bikker durante e conferencia di prensa dialuna mainta a sugeri cu e leynan ta hopi anticua tin biaha. 

INTENCION

E intencion ta pa e departamentonan concerni informa e mandatario si e leynan actual di huur e vehiculo asina ta up-to-date. El a indica cu ya caba el a haya cierto consehonan caba aunke no a bisa kico esaki ta. 

RECOMENDACION SPECIFICO

Loke cu por specificamente pensa ariba segun e mandatario ta reglamentacionan specifico den otro paisnan pa e vehiculonan aki pa seguridad. Entre nan, Bikker ta referi na e regla di controla e vehiculo prome cu e use. "Ora cu un persona aplica pa huur un vehiculo asina, nan ta dune minimo 15 minuut di instruccion pa wak si e ta compronde con e vehiculo aki ta funciona" Bikker a bisa. Esey ta importante mirando cu e vehiculo aki por ta parse un auto, pero nan tin nan aspectonan diferente no identico na un auto. Turistanan ta core esaki keriendo cu ta mescos cu ta un auto, siendo cu esaki no ta e caso. Como tal Bikker a sugeri cu porta ora cu bay verhuur un vehiculo asina, mester reglamenta esaki tambe na Aruba.