Minister ta sigura cu e no a mete den operacion di Guarda Nos Costa

ORANJESTAD - Minister di husticia Andin Bikker diadomingo mainta desmenti categoricamente cu el a interveni pa laga un of mas persona den libertad despues di un operacion di Guarda Nos Costa diabierna. Henter fin di siman esaki tabata noticia, debi cu ta acusa e mandatario (atrobe) di a purba mete den un operacion, te na e nivel cu e trahadonan di e departamento lo ta(bata) indigna y cu e hefe (Trudy Hassell) tabata a punto di entrega su retiro. 

E SUSESO

E mandatario a sigura den e conferencia cu su unico envolvimento den e caso tabata ora cu un colega minister a yame y bise cu GNC lo a detene hendenan local tambe, siendo cu esey pa ley no por. E mandatario a haya siguransa cu esey lo no tabata e caso, y cu e unico persona cu a keda deteni lo tabata e doño di e negoshi pasobra e no por a demonstra su cedula. E mandatario a sigui splica cu ta 3 persona a keda deteni finalmente cu a resulta sin papel. Y cu e compania mes a paga nan pasashi pa saca nan asina for di Aruba. Mes momento a sigura cu lo multa e compania pa esaki. E diferencia di version segun e mandatario, a surgi riba rednan social unda cu supuestamente e doño di e compania FAST Delivery Services, lo a bisa algo otro den otro medio. NoticiaCla a compronde cu e compania lo a emiti un comunicado dunando nan banda di nan medaya. E portal aki no a ricibi e comunicado aki, pero a deduci cu nan ta sigura cu e director mes a bay voluntariamente cu Guarda Nos Costa, y no a keda deteni. 

DISCREPANCIA CU HASSELL

Entre e preguntanan cu a surgi ta cu si enberdad tin discordia entre e mandatario di husticia y e hefe di GNC, esta Trudy Hassell. Ambos durante e conferencia di prensa a desmenti esaki y a sinta hunto pa mustra cu nan ta ok cu otro y cu no tin problema entre nan, te pa Hassell tuma su retiro. 

CASO DEN PUBLICIDAD

Esaki no ta e prome biaha cu un actuacion di GNC ta den publicidad y uno negativo, indicando cu e departamento lo no sa kico nan trabou ta. Un di e ultimo biahanan tabata durante un accion na San Nicolas ora cu aki a bay cu tur e animeermeisjes di varios bar, debi cu nan no por a demonstra nan documentacion neccesario. Aki a acusa e departamento di ta actua incorecto, cu a pone cu e mandatario y e hefe di GNC mester a bin dilanti tambe den un conferencia di prensa pa mustra cu cos no tabata asina.