Ministerio publico a acepta 'fayo' cu a laga otro pedofiel den libertad

ORANJESTAD - Ministerio Publico pa medio di su PG interino Frans Deutekom diadomingo den un conferencia di prensa, a acepta nan responsabilidad pa nan fayo. E fayo tabata cu nan a laga un pedofiel den libertad prome cu esaki a completa su condena di prison. Legalmente a laga e pedofiel liber, pero e fayo ta cu a cambia e maneho sin avisa minister, cu a pone cu e mandatario a firma e acuerdo sin sa. Si tabata sa cu tabata trata di un pedofiel, por a haci algo otro y evita e libertad 'prome cu tempo'. 

DI DOS PEDOFIEL

Esaki ta e di dos pedofiel cu ta recobra su libertad prome cu tempo. Pa ambos fayo, (e prome ta cu e minister a firma e decreto sin ta na altura cu tabata trata di un pedofiel, e minister tambe a asumi su responsabilidad y a pidi disculpa publicamente. Mes momento e mandatario a bisa di lo tuma paso pa wak si por coregi e fayonan recien cometi. 

OM

E mandatario no tabata contento cu ministerio publico a actua recientemente sin pone na altura cu nan a cambia un maneho desde 2014 ora cu a cambia e ley e tempo ey pa laga tur hende den libertad prome cu tempo (VI) sin tene cuenta cu e delito cu e persona a comete. Pa e casonan manera un pedofiel, a haci otro areglo e tempo ey cu tabata aplica.  Pero ministerio publico recientemente a revoca e parti ey cu a pone cu atrobe ken cu ta, pa ki delito cu nan a comete, por bin na remarke pa libertad tempran. E mandatario, no sabiendo esaki, a firma e libertad pa e persona ultimo aki cu a pone cu a resulta cu un otro pedofiel a sali liber atrobe. 

COREGI

Awor e mandatario a firma un decreto diadomingo cu ta pone cu lo bay institui un comision cu tin cu percura pa traspasa segun articulo 32 di codigo penal, cu cada caso ta wordo pasa pa Centraal College di Reclassering (CCR) prome cu un persona recobra su libertad. Pa loke ta e personanan cu a haya nan libertad ( e dos pedofiel), ta bay wak si por haci algo ainda pa ainda purba 'revoca' e desicion y e maneho y asina pone cu nan por sinta nan castigo completo.