Aruba a manda palabra di condolencia pa morto di Kofi Annan

NEW YORK - Gobierno di Aruba a manda palabranan di condolencia na su casa y su yiunan, demas famia y mundo henter cu a perde un homber ehemplar. Mundo sigur a wordo yena cu tristesa cu e noticia di fayecimento di un gran ser humano. Ex Secretario General di Nacionnan Uni y ganador di Premio Nobel di Paz, señor Kofi Annan a fayece na edad di 80 aña. Annan, a nace na Ghana na aña 1938. E tawata e di siete Secretario General di Nacionnan Uni sirbiendo for di 1997 pa 2006. 

Annan, un humanitario cu diferente talento y cualidadnan, ta wordo considera un di e diplomaticonan di mas famoso di mundo y un simbolo carismatico di UN kende virtualmente a dedica henter su careda como un administrador di Nacionnan Uni. 

Despues di su partida di UN, señor Annan a laga atras un organisacion global mucho mas agresivo y comprometi pa mantene paz y pa lucha pobresa poniendo enfasis riba derecho y desaroyo humano.

Segun Gobierno, como parti di Reino Hulandes, Aruba a benificia grandemente di e manera cu Annan a traha pa Nacionnan Uni pasando den retonan grandi. Mundo pa semper lo recorda señor Kofi Annan pa su cualidad humano como un homber cu ta kere firmemente den dialogo como e cualidad humano mas efectivo pa asegura pas y comprendemento.  Cu señor Kofi Annan sosega na paz.