Hobencita accidenta na Aruba a yega Puerto Rico pa tratamento

SAN JUAN (PR) - E hobencita di 7 aña Jednnieliz a yega Puerto Rico diabierna porfin cu air ambulance despues di varios intento. Unabez na Puerto Rico, ambulance a transporte pa e Hospital Pediadrico. Un turista di Puerto Rico a yuda cu e finanza pa e transporte por a tuma lugar. E caso a bira noticia hopi liher y via prensa di e isla, entre otro Noticentro di WAPA TV, por a logra haya e imagenan aki. Potret y informacio cortesia WAPA TV y Deborah Martorell.

AYUDO

Desde oranan di mainta di diahuebs dokternan tabata preparando pa manda e mucha cu a accidenta den buggy bek Puerto Rico. Asina minister di Salud Dangui Oduber a informa diahuebs anochi riba su pagina di Facebook. Gobierno di Puerto Rico mes a cubri parti di e gastonan di air ambulance, y e resto di e suma a wordo paga pa un turista cu tambe tabata riba e crucero. Gobierno di Aruba mesora a para cla pa yuda pero no tabata necesario. Nan ta en espera di e air ambulance cu ta yegando di Miami pa transporta e mucha pa Puerto Rico. 

E CASO

Tabata diaranson mainta cu e noticia a plama cu un grupo di turista riba nos isla tabata envolvi den un accidente serio na Malmok diaranson, unda cu un di e turistanan lo a perde parti di un pia. Alto comisario di polis Andrew Hoo a confirma cu e accidente a sosode 10 pasa di 11'or di diaranson mainta. E accidente di trafico serio diaranson mainta na Malmok tabata entre un chauffeur di un van di huur y chauffeur di un buggy UTV cu tabata parti di un tour. Esnan riba e tour, tabata turistanan di bapor crucero, pues un dia so na Aruba, mientras cu esun di e van ta un famia completo cu ta di vacacion na Aruba y hospedando den hotel.