Gran parti di fondo TPEF ta destina pa Malmok Boardwalk

ORANJESTAD - Ayera diahuebs, Parlamento di Aruba a aproba e presupuesto 2018 di e Tourism Product Enhancement Fund (TPEF). E preguntanan cardinal cu a ser haci pa forma e vision ta, 'kico ta importante pa producto Aruba y pakico mester inverti den producto Aruba?. 

BOARDWALK Y CAMINDA PA LIGHTHOUSE

Segun e mandatario di turismo Dangui Oduber, e inversionnan mas grandi pa e fondo aki ta encera e 'Malmok Boardwalk', cual ta cuminsa na Ritz Carlton y ta termina na e crusada di Malmok. Tambe lo inverti pa drecha e palonan di luz riba caminda pa yega California Lighthouse, unda cu actualmente tin 27 palo fuera di funcion, lagando e caminda sin iluminacion. California Lighthouse ta un di Aruba su atraccion turistico mas bishita, cual ta haci e inversion aki importante, ya cu gobierno ta trahando pa eleva e siguridad pa nos bishitantenan, como tambe nos hendenan local.

PRESERVA MEDIO AMBIENTE Y CULTURA

Na banda di e inversionnan cu lo wordo haci pa medio di TPEF, e fondo lo ta aportando na otro aspectonan di e area, trahando cu diferente stakeholder. E aspectonan ta encera preservacion di e medio ambiente y herencia cultural. Programanan di conscientisacion, manera entre otro 'Stima mi, Sterilisa mi' lo haya nan debido sosten. Tambe lo ta trahando riba embeyecemento di areanan turistico, door di percura pa e mantencion debido di e infrastructura y paisahe. Potret cortesia ArubaRealEstates.com