Trabounan riba Watty Vos Boulevard ta sigui hopi lento

ORANJESTAD - Aki dos siman e prome fase di Watty Vos Boulevard entre rotonde di Sabana Blanco pa e rotonde di Cumana (ex Codemsa) mester ta termina. Por lo menos esey tabata e acuerdo cu DOW tabatin cu minister di infrastructura Otmar Oduber. Pero for di e trabounan pendiente, no ta sigur cu esaki lo por keda cla y cumpli cu e palabracion, un biaha mas. 

ASFALT

Un ehempel ta cu siman pasa dialuna a cera e caminda entre e rotonde di Sabana Blanco pa Aruba MufflerShop pa 'reparacion di asfalt'. Despues di algun contratiempo, berdad a cera e caminda, pero un siman y mei despues, ainda no a cambia nada di e asfalt. Despues di varios dia sin haci nada riba e parti cera, a cuminsa cu trabou di cobamento riba e caminda, na varios area. Pero siman a cera sin nada di asfalt. Y falta basta ainda pa keda cla cu e caminda completo, te pa entrega e parti aki. No ta conoci si a bolbe haya contratiempo na caminda cu a pone cu esaki lo conoce otro retraso.