Riu Palace Antillas a habri su porta cu 52% di ocupacion

ORANJESTAD – Cu un ocupacion di 52%, Rui Palace Antillas (481 camber) a habri su porta na Aruba diasabra. E prome dos huespednan a keda ricibi pa e gerente general Richard Velazco, cu tabata contento di brinda un producto nobo, mei mei di su 400 y pico trahadonan cu tambe ta ‘relativamente’ nobo. Manera ta custumber di e cadena hotelero RIU, nan apertura nan semper ta inicialmente ‘soft’, esta cu no mucho fanfaria. Cu esaki, RIU oficialmente tin dos propiedad den operacion, di cual e ultimo aki su caracteristica ta cu e ta un hotel pa ‘adulto’ solamente. Esaki ta nifica cu no ta permiti mucha den e hotel.

Den combersacion cu Velazco, e la conta NoticiaCla.com cu e apertura a bay bon, y cu tur hende tabata sumamente contento. “Tur cos ta operacional. Nos a haya bon comentario di e hotel, y tambe di e calidad di cuminda cu e restaurantnan ta brinda”, Velazco a bisa. Pa un apertura, 52% ta considera como hopi positivo pa e hotel, aunke cu e custumber di e hotel ruman, RIU Palace, ta di minimal 85 -98% di ocupacion henter aña.

For di momento cu e trabounan di renobacionnan a cuminsa na februari ultimo, tabata bisto cu esaki lo a bay cu e mesun speed cu cual a construi e RIU Palace, un banda. Un brug ta fisicamente conecta dos Riu hotel cu otro na Aruba. Un paso logico si mira cu e operacion lo uni dos propiedad bou di un solo maneho. Remarcable ta cu e hotel ta propaganda su mes como un hotel ‘all inclusive’ exclusivamente pa adulto solamente’. E ta ofrece entre otro un gym gratis, y tres restaurant tematico, y un sin fin di actividad pa ‘adulto solamente’.