Botica ta mustra pakico aunke nan si tin vacuna, esaki ta mas caro

ORANJESTAD - E hecho cu Aruba un biaha mas no tin stock di vacuna, tin algun hende disgusta. Pero den e caso aki no necesariamente pasobra no tin e vacuna, pero mas bien pasobra e stock cu cierto botica (Botica di Servicio na Eagle) ta ofrece di e vacuna, ta na un prijs mucho mas caro. NoticiaCla a compronde for di e botica en cuestion, cu tin un motibo simple pa e prijs diferente. Nan (e botica) no ta haya e vacuna na un prijs subsidia (manera ta e caso cu dept di Salud (DVG)), y tin cu busca esaki riba mercado regular na p.e. Hulanda. DVG di nan banda tin un acuerdo cu Pan American Health Organization (PAHO) pa haya esaki mas barata y un prijs subsidia. 

DEMANDA

Problema cu tin aworaki, ta cu lastimamente pa Aruba, tin paisnan na unda cu e demanda pa e vacuna en cuestion ta hopi mas halto cu pa Aruba, y consecuentemente tin un prioridad mas halto pa ricibi esaki. Esey ta pone cu, mientras cu DVG su acuerdo cu PAHO ta permitie haya e vacuna na un tarifa subsidia, e 'downside' di esaki ta cu nan ta depende di e demanda y prioridad. Y aworaki Aruba no ta un prioridad pa PAHO pa cu e vacuna. Y pesey Aruba cada bez ta keda sin un stock manera nan a bin ta raporta cada bez.  

SERVICIO

E botica en cuestion a dicidi di yuda cu e demanda, y a busca esaki riba su mes. E consecuencia aki ta cu ta hay'e riba mercado regular na un tarifa 'regular' pa cual nan tin cu paga pe ya cu contrario na DVG, nan no ta hay'e subsidia. Pesey e prijs e ora na final ta bira mas caro, aunke cu e meta final ta cu tin e vacuna. Pues den e caso aki ta pagando pa un servicio. Nan a lamenta cu tin critica riba e tema aki, siendo cu nan ta simplemente purbando di yuda cu e demanda di vacuna. 

PROCESO

E proceso pa haya e vacuna via e botica, ta cu bo ta bay na e botica (Botica di Servicio na Eagle), paga pa esaki. Cu e recibo, bo ta bay na dept di Salud (DVG) cu ta duna bo e ora e vacuna, pasobra ta DVG ta wanta e vacunanan di e botica.