Directiva interino mes a bira directiva definitivo di Parke Arikok

ORANJESTAD - E directiva interino di Parke Arikok mes a keda nombra como e directiva 'definitivo'. Asina un huez a dicta diabierna den corte. Ta trata di e personanan Fredis Refunjol, Helen van der Wal, Jossy Laclé y Norman Kuiperi. Nan nombracion ta pa un periodo indefini, y lo tin cu keda amplia cu un persona mas den un futuro cercano. Huez a haya prudente pa e directiva aki mes keda, mirando e trabou cu nan a desplega, y pa bienestar di e continuidad di e Parke mirando e problema serio cu e tabata confrontando ultimo tempo. 

ARGUMENTO

Tabata dia 20 di juni ultimo cu huez a nombra e personanan aki en cuestion pa un periodo di algun siman, cu mester a busca candidatonan pa forma un directiva 'definitivo'. A resulta cu nan mes a pidi pa haci e funcion aki mirando e trabou cu nan a desplega, pero pa periodo di 1 aña so. Huez no a acepta esey mirando e situacion problematico cu e PArke a haya su mes aden. Y no kier bay haya un problema similar den apenas un aña, pues a rechasa e peticion y a opta pa haci e termino 'indefini', y cu e miembronan mester stipula un forma di cambio, di un forma cu ta bon organisa pa no perhudica e liderazgo di e Parke. Ademas e directiva lo tin cu apunta u Hunta di Supervision den un futuro hopi cercano, y amplia e directiva actual cu un miembro mas. 

CAMBIO DI STATUTO

Notable tabata e peticion di e dos gruponan no gubernamental, Turtuga Aruba y Aruba Birdlife Conservation pa mantene e statutonan manera nan ta aworaki, esta den un forma di 'one-tier', pa salvaguardia e forma di maneha e parke. Si bay pa un modelo di goberna estilo 'two-tier', tin chens cu e poder di e NGO's lo disminui y cu gobierno por haya mas poder. E directiva interino a trata esaki tambe, y a  sugeri den cuadro di esaki, pa nombra un Hunta di Supervision, den cual lo tin un experto riba e tereno di naturalesa, cu tin cu salvaguardia e interesnan aki y crea asina un 'two tier'. Asina e directiva ta bira uno mas profesional, y huez a bay di acuerdo cu e directiva  Ademas a sugeri pa cera un acuerdo entre gobierno y e Parke cu ta sigura e deber y derechonan reciproca di ambos banda. Na final huez a opta pa bay di acuerdo y nombra e mesun miembronan di directiva interino, den uno definitivo. Oficialmente a retira e directiva 'interino' y nombra nan despues mesora como e directiva 'definitivo'. Lesa e desicion AKI.