Director di dept. di Salud a perde caso contra minister di Salud

ORANJESTAD - E director di departamento di Salud (DVG) Jerry Staring a perde su caso contra minister di salud Dangui Oduber diabierna. Huez a rechasa su demanda pa declara e decision di e mandatario pa Staring traha como 'beleidsmedewerker' y no como director, nulo. Huez a bisa cu no tin base huridico pa dicta na fabor di Staring. Esey kier men cu Staring mester traha como 'beleidsmedewerker' pa e periodo stipula pa e mandatario. 

E CASO

Staring a hiba e mandatario corte dia 8 di augustus ultimo, bringando e decision di dia 6 di juli ultimo di e minister pa haci Staring un 'beleidsmedewerker' pa un periodo defini, y cu asina so e por drenta DVG y traha. E decision di e mandatario di e fecha ey tabata basa riba un sentencia di huez (tambe riba e dia ey) cu a bisa cu minister no por tene Staring na cas, y cu e mester permiti'e pa traha bek na DVG. E mandatario a bay di acuerdo, pero cu e condicion menciona. Staring no a haya esey corecto y a bringa e minister den corte un biaha mas. 

ARGUMENTO

Segun Staring, e minister tabata abusa di articulo 52 lid 1 di LMA, pa purba desvia di e sentencia di huez. Tambe Staring a argumenta cu e minister no a usa un base valido pa e decision y no a motiva e decision drechi. Minister su argumento den corte tabata basa riba argumentonan di Departamento di Recurso Humano (DRH), cu mester haci un cambio den e departamento, y cu tabatin protesta di hopi trahado pa e mal trabou di e director. E mandatario a argumenta tambe segun su abogado, cu a duna e director te dia 6 di september proximo pa ta beleidsmedewerker, dunando e team di investigacion suficiente tempo pa haci nan trabou investigativo. E ausencia di e director lo a evita cu e por a 'frustra' e investigacion. 

HUEZ

Huez den e caso aki no a mira motibo pa honra e peticion di Staring. A basa riba e hecho cu pa honra e peticion, mester tin un indicacion cu den un caso di profundidad despues, e chensnan cu e por gana esaki ey tambe, ta posibel. Pero den e caso aki, e no ta mira cu den e caso di profundidad tin asina hopi inseguridad cu e minister por gana, pa hustifica un decision na fabor di Staring.  Segun huez, minister su abogado a hiba un defensa extenso pa motiva su actonan. Tambe no por papia di un mal maneho y e director no a presenta un motivacion diferente y nobo pa convence e huez otro forma. El a mas bien concretisa e motivacion breve di e decision tuma anteriormente. Ademas, segun huez, a duna Staring amplio oportunidad pa reacciona riba esaki. Y tampoco a protesta cu e asunto a perhudica su posicion di director. Como tal e huez no ta mira un base pa dicta na fabor di e director y a rechasa e demanda. Lesa e veredicto AKI.