Reduccion di gasto di personal ta tardando presupuesto 2019

ORANJESTAD – Tin posibilidad cu presupuesto 2019 toch no ta yega Parlamento na tempo. Asina Prome minister di Aruba Evelyn Wever Croes a indica na NoticiaCla diahuebs den un conferencia di prensa, ora cu el a bisa cu presupuesto 2019 ‘no a sali for di gobierno ainda’. Esey ta nifica cu e tin cu bay Raad van Advies ainda, y esey ta tuma su tempo. Pues posiblemente e presupuesto lo keda entrega algun dia despues di e fecha cu e mester keda entrega, cu ta 1 di September 2018. “Nos a informa Parlamento y e institutonan” Wever a bisa, preparando nan pa un eventual tardanza. “E reduccion di gasto di personal ta resulta di ta mas complica pa ehecuta cu nos a pensa, cu e lo ta den prome instante” Wever a bisa NoticiaCla.

TRAHANDO EXTRA

Wever a sigura cu mustra cu tur e ministernan ta reuniendo tur atardi pa reuni 5:30pm pa ministerraad extraordinario pa reuni riba e ultimo ultimo detayes. “Nos no kier pone presion riba CAFT y Raad van Advies, pero e (presupuesto) lo ta saliendo si pa e institutonan y despues pa Parlamento” Wever a sigui bisa. E por tin un poco retraso” Wever a sigui bisa riba e timing di e presupuesto. “E decision cierto momento tabata den mi man. Mi por sake manera e ta, of mi ta hacie mas miho posibel cu ta haci e ehecucion otro aña miho”.

LEY

Pa ley, e presupuesto mester keda entrega na Parlamento pa 1 di September di e aña anterior. Algo cu ultimo añanan no a sosode. Y awor cu e vigilancia di CAFT, a pone hopi presion riba gobierno, pa esaki si sosode na tempo, contrario di e situacion di añanan anterior.

INTENCION

Un luna pasa ainda (27 di juli), Wever a bisa NoticiaCla ainda den un otro conferencia cu e intencion tabata pa gobierno ainda logra entrega presupuesto 2019 na tempo na Parlamento esta 1 di September proximo. E mesun mainta ey e mandatario a reuni den seno di conseho di minister riba e tema. “Tur cos, tur esfuerzo ta wordo haci pa e (presupuesto) bay Raad van Advies e siman aki pa nan por cuminsa traha riba dje. “Cu e speranza cu e ta yega Parlamento na tempo” Wever a bisa. “Ketobay esey ta e plan” e mandatario a bisa. Di otro banda e ta tene cuenta cu na caminda cierto cosnan por pega. Y awor ta resulta cu e cierto cosnan a resulta e asunto di reduccion den gasto di personal.