Gobierno: Utilities (WEB/ELMAR) ta paga solamente 100.000 florin pa Green Conference

ORANJESTAD – Companianan di utilidad ta contribui apenas 100.000 florin na e green conference y no miyones manera ta wordo bisa. Minister Otmar Oduber a sigura NoticiaCla.com cu e la mira esaki den e jaarrekeningen, cu ta demostra esey. “E resto ta bin di companianan priva”. Banda di esey, e dividendo cu enberdad e companianan di utilidad ta pagando pa aña ta 1 miyon, pero no na gobierno sino na utilities pa e por drai. “ Ta trata di 1 miyon vs e 36 pa 38 pico miyon pa aña cu antes gobierno di otro signatura tabata ricibi”. Oduber ta sigura cu e ultimo 5 añanan cu gobierno no a ricibi dividendo di ningun di e dos companianan aki. “Ningun florin di dividendo”.

Jaarrekeningenan segun Oduber a sigura NoticiaCla.com, ta mustra pues cu no ta miyones cu ta inverti den e Green Conference ultimo aki. E ta sigura cu e la tira un bista riba e jaarrekeningen y esey ta loke ta poni. Pues e ta contradeci ponencianan cu e suma ta sumanan miyonario.

E critica e siman aki ta cu mientras cu prijs di petrolio tabata baha barbaramente na mundo (bou di $86.00), na Aruba ta aumenta tarifa di coriente cu average di 12%. Tambe cu Green Conference di e aña aki atrobe ta wordo financia cu miyones di Elmar y WEB. Mester bisa cu no a mustra prueba si, pero cu lo a mira e cifranan di e rapportnan annual di e compania (den pasado) cu lo ta mustra cu esaki ta e caso. NoticiaCla.com ta investigando e cifranan aki pa mira kico realmente ta para den e rapportnan annual aki.