No por para 1000 camber All Inclusive extra pa Holiday Inn aunke tin un ley

ORANJESTAD - Gobierno no por para e acto di 1000 camber all-inclusive pa doñonan di Holiday Inn (Grupo Lowenstein), no obstante e hecho cu tin un ley cu ta regula e aspecto di All Inclusive pa netamente evita esey. E siman aki NoticiaCla a confronta e mandatario di turismo Dangui Oduber cu a pregunta, y e mandatario a confirma e hecho cu gobierno anterior a otorga e cantidad di cambernan menciona. Hopi a cuestiona esaki mirando cu e ley di All Inclusive mester a 'evita' un acto asina. Pero segun minister di infrastructura Otmar Oduber a splica NoticiaCla diahuebs mainta, actonan di e gobierno anterior (manera no publica e ley na tempo) a pone cu gobierno actual no por a haci nada awor. 

PUBLICA LEY Segun Oduber, gobierno anterior tabata sa cu e ley (di All Inclusive) tabata na Parlamento, pero scondi tra'i lomba di tur hende, a bay duna e mil cambernan All Inclusive, contra e ley cu tabatin. "El a pasa e acta (ex minister Benny Sevinger) despues cu hasta e ley a wordo aproba den Parlamento di Aruba" Oduber a bisa. E problema awor ta cu no a publica e ley, y como tal e ley no a bira oficial y e ex mandatario por a pasa e acta na notaris na e forma legal. Segun Oduber, ta straño cu den un acta notarial a pone specificamente cu ta haya 1000 camber pa All Inclusive. Si a pone solamente 1000 camber, sin notifica cu ta All Inclusive, y a publica e ley, e ora nunca e compania por a haya e 1000 cambernan den erfpact manera determina.