- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Arubahuis: Opvangweek tabata positivo pa studiantenan nobo for di Aruba
DEN HAAG – Arubahuis por mira bek riba un Opvangweek 2018 sumamente positivo pa studiantenan nobo for di Aruba na Hulanda. Asina un comunicado di ArubaHuis ta bisa diahuebs. Segun Arubahuis, esaki ta sigur danki na e esfuerso y trabou incansabel di tur e miembronan di e diferente Plaatselijke Opvangcommissies (POC’s) como tambe di e mentoren di diferente regio. E studiantenan nobo for di Aruba a yega Hulanda e aña aki dia 5 di augustus ultimo unda cu a start mesora cu e asina yama opvangweek den e diferente cuidadnan. Un grupo grandi di studiante di Aruba a participa na un siman yen di actividad y informacion como introduccion na nan bida nobo na Hulanda. E grupo mas grandi di studiante e aña aki tabata un biaha mas pa e regionan den Randstad manera Den Haag/Delft/Leiden, Utrecht y Rotterdam.
E Plaatselijke Opvangcommissies di e diferente regionan a prepara un programa extenso y varia cu a inclui bishita na e instancianan relevante manera Gemeente, banco y DUO como tambe sesionnan di informacion y actividadnan social y cultural pa asina e opvangweek por ta un experencia completo pa e studiantenan nobo. Mester menciona cu e trabou di e POC y e mentor no a inicia na yegada di e studiantenan nobo pero tur POC y mentoren tin varios luna di preparacion pa coordina e programa como tambe percura pa informacion na e futuro studiantenan hasta prome cu nan yega Hulanda. Tin varios mentor y POC cu den transcurso di aña ta duna informacion boluntariamente na futuro studiantenan durante un estadia na Aruba. Aunke e opvangprograma oficial di e diferente regionan a finalisa ainda tin varios POC y mentor activo ta guia y asisti e studiantenan cu ainda falta vivienda of cu tin cualkier otro asunto pendiente cu mester wordo regla prome cu e aña escolar cuminsa.
Na final di e opvangweek e diferente opvangcommissies a evalua e siman y a ricibi feedback di e studiantenan nobo pa asina por inventarisa e puntonan di atencion pa e siguiente aña. Tambe diferente mentor a evalua e siman di opvang hunto cu nan POC’s y por a intercambia di idea pa mehora e organisacion y informacion. Aunke cu por lo general e opvangweek a cana sumamente positivo den e diferente regionan toch por a constata cu ainda tin varios studiante cu no ta bin prepara pa e reto nobo di studia y biba na Hulanda. Apesar di tur e informacion cu ta wordo duna riba medionan digital como tambe durante encuentronan informativo na Aruba toch por constata cu no ta tur studiante ta tuma bon nota di e informacion of cu e informacion pa un motibo of otro no ta alcansa nan. Aki ta trata den mayoria caso riba informacion y rekisitonan pa por haya vivienda, documentonan necesario cu mester trece for di Aruba y tambe procesonan via scol na Hulanda of e instancia di financiamento di estudio na Hulanda (DUO) cu mester a wordo inicia of completa na Aruba. Tin studiantenan cu na yegada ainda no a haci nan studiekeuzecheck, no a aplica pa DUO of no a aplica na ningun organisacion di vivienda.
E falta di preparacion ta keda un punto di atencion hopi grandi y ta conduci na frustacion y stress innecesario cerca e studiante nobo pero tambe cerca mayornan y pa esnan cu ta responsabel pa e guia y sosten na Hulanda. Arubahuis ta keda enfatisa riba e importancia di un bon preparacion y ta conseha tur futuro studiante pa tuma accion na tempo. Manera e dicho ta bisa na Hulandes “Een goede voorbereiding is het halve werk”. Esaki ta percura pa bo start riba un bon pia na Hulanda y cu bo por concentra riba bo meta principal cu ta bo estudio.
Como futuro studiante nos ta conseha pa acerca e decanaat di bo school pa informacion y conseho, acerca Departamento di Enseñansa pa informacion, asisti na tur e encuentronan informativo y tuma bon nota di tur informacion cu ta wordo publica den medionan na Aruba y cu ta wordo comparti riba e diferente websites y riba social media. Pa loke ta informacion di Arubahuis, e mentoren na Hulanda como tambe e POC’s por check riba e website www.arubahuis.nl y e Facebook pagina’s “KabinetAruba” y “OnderwijszakenArubahuis”. E studiantenan por haya e contactinformatie di tur mentor riba e website di Arubahuis. Mayoria POC tambe tin na mesun Facebook pagina pa asisti studiantenan te caminda cu nan por cu nan preparacion pa bin Hulanda.
Den transcurso di e simannan nos dilanti Arubahuis lo tene un encuentro hunto cu e presidentenan di e diferente POC’s y e mentoren pa evalua tur e puntonan cu a bin dilanti y bin cu un plan di accion cu lo wordo comparti y evalua hunto cu e instancianan educacional y gubernamental na Aruba cu ta encarga cu e guia y preparacion di e hoben pa studia den exterior. Arubahuis ta gradici un biaha mas e diferente Plaatselijke Opvangcommissies y e mentoren pa tur nan trabou y esfuerso pa guia y sostene nos studiantenan nobo optimalmente y ta desea nos studiantenan nobo tur clase di exito cu nan estudio y bida na Hulanda.
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Follow NoticiaCla
