Otro aña escolar nobo a cuminsa na Aruba awe

ORANJESTAD - Un otro aña escolar nobo a cuminsa awe, y cu ne, tur e retonan cu ta forma parti di e proceso aki. Pa e grupo di mucha riba e portada, ta nan prome biaha cu nan ta bay 'scol pa mucha grandi', esta 1e klas. Pa hopi mucha, esaki ta nan prome experiencia como alumno, mientras cu pa otro, e ta un simple aña escolar nobo. Algun mucha ta cuminsa un grado nobo, un episodio diferente, manera e paso di kleuterschool pa scol primario, mientras cu otronan ta tuma e paso mas grandi, cu ta di scol primario pa scol secundario. Y cu nan, nan mayornan cu tambe ta forma parti obviamente di e proceso aki. Pa algun mayor, ta prome biaha cu nan yiu(nan) ta cuminsa scol, y mester custumbra pa 'laga los', completamente cu e 'drama' cu ta bay cu e proceso. Pa otro mayornan, nan mester a prepara nan yiunan pa un ciclo nobo di scol. Manera cu un parlamentario a bisa e siman aki den un comunicado, ta e mayor ta keda esun prome responsabel pa educacion di nan yiu. Bay scol, ta un otro forma, pero cu e realidad ta cu e enseñansa inicial ta keda na e mayor. NoticiaCla ta desea tur mucha y nan mayornan, tur clase di sabiduria y perseverancia cu e prome dia di aña escolar 2018.