Asdrubal Chavez (CITGO) poni pa reuni cu Evelyn Wever otro siman

ORANJESTAD – Despues cu a reuni cu e delegacion di CITGO Aruba na nivel local, otro siman prome minister Evelyn Wever ta poni pa reuni cu e CEO di Citgo Petroleum mes, esta Asdrubal Chavez. E reunion aki ta programa pa tuma lugar na Aruba. Asina Wever a bisa NoticiaCla diaranson. E intencion ta pa reuni cu ne mitar di otro siman pero ta warda un que otro palabracion. E siman aki e delegacion local a priminti inversion di 35 miyon dollar y mas empleo.

REACCION

E reaccion mientrastanto di e anuncio e siman aki di e encuentro na nivel local cu CITGO Aruba, no a cay den mucho bon tera. Por lo menos, hopi hende ta sceptico di e palabracion haci y no ta kere e loke cu CITGO a bisa Aruba. Entre otro pasobra e situacion financiero internacional no ta di gaba, y no ta mirando actividad den e refineria. Pues cu si no tin ni actividad awo, ki actividad por tin te pa cuminsa cu fase 2. Ta mustra cu CITGO ta tumando nos haci y cu esaki ta rekmento di algo cu no ta bay materialisa. Wever a bisa NoticiaCla riba e reaccionan aki cu e tampoco ta kere tur cos sin mas, pero cu mester duna nan beneficio di duda. E reunion di otro siman ta programa pa mitar di siman, pero mas den siman aki lo por confirma tur cos exactamente.

E REUNION LOCAL

Tabata diamars cu gobierno a informa cu CITGO Aruba a informa nan durante un reunion cu lo duna inicio di fase 2 di inversion cuminsando otro luna, cu un inversion di 35 miyon dollar y cu ta genera empleo pa 150 persona adicional. Asina un comunicado emiti pa gobierno di Aruba, ta bisa diamars. Den un reaccion pa NoticiaCla diamars, e mandatario a splica cu e reunion aki tabata cu ehecutivonan local di CITGO, y cu e reunion cu e ehecutivonan Mericano, ta planea pa otro siman. 

VISA DI CHAVEZ

Tabata luna pasa cu gobierno Mericano a informa cu nan a revoca e visa di e CEO y presidente di Citgo Petroleum Corp, esta Asdrubal Chavez, pero no a duna e motibo. Departamento di estado di Merca a sigura cu nan tin e autoridad di revoca visa, pero no ta discuti casonan individual pasobra ley no ta permiti esey.  Un vocero di Citgo a bisa cu e operacion diario ta sigui normal y cu e liderazgo no ta cambia. Chavez e momento ey a haya 30 dia pa bandona Merca. Chavez a keda nombra hefe di Citgo door di presidente Venezolano Nicolas Maduro na 2017. Na mei, presidente Mericano Donald Trump a firma sancion economico contra Venezuela. Parti di e sancionan tabata pa perhudica Citgo. E tempo ey no tabata conoci ki efecto e noticia lo tabatin pa Aruba. Tabatin te hasta rumor cu Chavez lo kier a bin opera for di Aruba. Pero Wever a desmenti e noticia aki mesora, citando entre otro CITGO como fuente.