Aruba un biaha mas afecta pa brote di malesa di cacho Parvo

ORANJESTAD – Aruba un biaha mas ta afecta pa un brote di e malesa di cacho ‘Parvo’, cu ta afecta primordialmente cachonan ‘puppy’. Dos veterinario reconoci riba nos isla, Natalie Booi y Pieter Barendsen a confirma esaki pa NoticiaCla diaranson. “Nos ta logra di scapa casi tur pero normal mortality rate ta 85%” Booi a bisa. Barendsen ta confirma e situacion.“No obstante tratamento, un cantidad di 35% no ta sobrevivi” Barendsen a bisa e portal aki. E unico forma pa vence e malesa mortal aki, ta pa vacuna bo cacho, sigur esnan bou di un aña di edad.

CON PA HACI

Segun Booi, berdad e unico forma pa preveni esaki ta pa vacuna bo puppy, (cacho chikito) y evita di bay cu ne yen di lugar. Ta un mal custumber (pero comprendibel) cu hende cu tin un puppy, kier bay tur caminda cu ne, laman, riba caya, aunke cu e no ta vacuna y of tin tur su vacuna. Nan ta haci’e pasobra sea e puppy ta ‘cute’ y kier ‘show off’ cu ne, of simplemente kier goza cu ne. Problema ta cu tanten cu e puppy no tin tur vacuna, e ta keda un risico grandi pa haya e malesa. Unabez cu e puppy tin tur su vacunanan, e tin resistencia contra practicamente tur malesa y ta ‘safe’ pa ta riba caya. Segun Booi, tin cierto rasa cu tin mas risico pa haya e malesa, manera cachonan color scur y tan.

CANTIDAD

E cantidad segun Booi ta hopi cu ta bin pa dia. “Nos ta haya entre 6 pa 10 caso pa dia. Nos ta logra salba mayoria pero e ‘mortality rate’ (cantidad cu ta muri) , ta keda halto na 85%. Veterinario conoci Barendsen tambe ta confirma esaki. Den su caso, e ta raporta pues cu 35% ta muri. Su experiencia ta cu durante periodo di vacacion, a trata hopi cachonan hopi malo cu Parvo, tur ta cachonan puppy no vacuna of sin tur nan vacuna, cu ta bin desespera en busca di ayuda. Tanto Booi como Barendsen a mustra cu riba nan respectivo paginanan di Facebook, tin tipsnan valioso cu por yuda un doño di puppy combati y nota e simptoma di un cacho cu por tin parvo. Cachonan puppy despues di 6 siman di bida, por cuminsa wordo vacuna, y ta sigui nan schedule di vacuna te ora nan completa nan serie di por lo menos 3 pa 4 (si ta cacho di exterior) vacuna.