OM: Prolongacion di detencion pa homber cu a agredi y mata Anuska Tromp

ORANJESTAD – Fiscal mayan lo pidi pa alarga detencion di e homber Roy C., acusa di a agredi Anuska Tromp cu resultado fatal recientemente. Asina vocero di Ministerio Publico Ann Angela a confirma pa NoticiaCla. “E investigacion mientrastanto tambe ta siguiendo” Angela a bisa. Pa loke ta e curpa di e victima, esaki a keda den libertad, pa asina e famia por cuminsa prepara pa e entiero. “E autopsia ta pa determina e letsel causa pa e crimen cu a hiba na morto di e persona. Asina cu e autopsia ta cla, e ta bay bek pa famia mas rapido posibel. Fiscal ta dune liber. Un autopsia ta forma parti di un investigacion manera esaki?” Angela a finalisa bisando.

E CASO

Roy C. a keda deteni diadomingo 5 di augustus den oranan di anochi manera NoticiaCla a raporta caba. "E sospecho lo wordo formula manera e investigacion cana  y e elementonan di prueba cay na nan lugar", vocero Angela a bisa e momento ey. Segun Angela, C. a keda deteni na ayera nochi na su apartamento na Pos Abou. Pa loke ta e señora, el a wordo hiba diadomingo prome cu merdia pa hospital, cu sla na su cabez y a bin fayece awe marduga. E causa exacto di e morto tin cu wordo determina a base di e autopsia cu tin cu tuma lugar ainda, pero pa cual no tin fecha ainda. Pa esaki, a confisca e curpa di e señora. E caso lamentable a tuma mas probablemente den oranan di diadomingo mainta mirando cu ta prome cu merdia e señora a wordo hiba hospital.