Grupo di trabou tin te September pa prepara restructuracion di Aruparking

ORANJESTAD – Den luna di September Minister Romero ta spera di por tin un bista amplio di cua lo ta e maneho apto pa hiba den Aruparking y duna e compania un restructuracion cu ta di vital importancia pa su existencia.

GRUPO DI TRABOU

Un grupo di trabou lo keda instala pa analisa e mihor manera pa restructura Aruparking y lo mester ta cla pa September. Asina minister di Transporte Chris Romero a informa diamars. Aruparking ta un di e companianan gubernamental cu for di su institucion a crea hopi polemica den nos comunidad. Segun e mandatario e no ta un secreto cu e situacion di Aruparking ta uno precario y esaki ta un di e tanto problemanan cu e Gobierno actual a hereda for di e Gabinete anterior. Segun Romero e grupo di trabou ta trahando hopi di cerca cu comerciantenan den Caya Principal. E intencion ta pa realiza un estudio profundo di e factibilidad y funcionabilidad di Aruparking den centro di Oranjestad.

DESEO

Segun e mandatario, mester considera e deseo di nos ciudadania, pero poniendo atencion special na loke esunnan directamente afecta ta pensa di Aruparking. Tampoco por lubida cu Pais Aruba a inverti un capital financiero grandi pa haci Aruparking bira un realidad. Pero tambe mester tene na cuenta cu Aruparking ta representa e sustento financiero di hopi famia. Si e compania cera, lo nifica cu lo tin un grupo di persona sin trabou, cual lo pone famianan den un situacion precario tambe, cual tampoco lo resulta beneficioso pa e economia fragil cu nos pais ta aden actualmente.

COMERCIANTENAN

E mandatario a sigui mustra cu un grupo di comerciante cu tin negoshi den centro di Oranjestad ta di acuerdo cu mester bin un regulacion di parkeo den Playa, pero esaki mester wordo implementa responsablemente y teniendo na cuenta cu e comodidad di nos turistanan y localnan ora di haci nan diligencianan den Centro di Oranjestad. Tur esakinan ta aspectonan cu ta den consideracion aworaki pa asina restructura Aruparking y haci’e funcional bek pero na beneficio di nos pais.

SEPTEMBER

Pues, den luna di september Minister Romero ta spera di por tin un bista amplio di cua lo ta e maneho apto pa hiba den Aruparking y duna e compania un restructuracion cu ta di vital importancia pa su existencia.