Grupo 'Union di Piscado' kier colecta firma contra Parke Marino

ORANJESTAD – Un grupo di piscado cu ta yama nan mes ‘Union di Piscado’, no ta contento cu e situacion rond di introduccion di un Parke Marino. Como tal, nan a haci un yamada pa un reunion urgente unda cu e intencion ta pa ‘informa un y tur di e desaroyonan cu ta menaza piscadornan, repentino, sin tene debido cuenta di piscadornan, di loke ta supuestamente Parke Marino’. Asina e aviso cu a keda publica den varios medio di comunicacion, ta bisa. E invitacion ta urgente pasobra segun e informacion, e ley ta ‘caba na Raad van Advies’, pues tempo ta cortico.

COLECTANDO FIRMA

A compronde cu e grupo aki ta colectando firma pa protesta contra e proceso hiba, y pa manda un carta cu e firmanan pa pidi Gobernador di Aruba pa no firma, ‘pa haci e ley aki un peso mas contra piscadornan’. Segun e invitacion, e Parke Marino ta afecta piscadornan negativamente, y e lo bay tin mas efecto negativo riba consumidor di pisca, bendedo di pisca, y tur usuario di laman. E reunion ta planea pa tuma lugar diaranson anochi na Piedra Plat.

GOBIERNO

Tabata siman pasa ainda cu minister di Medio Ambiente Otmar Oduber a sigura cu e parke aki no ta bay tin ningun peliger pa e piscadornan y cu tur cos lo ta bon regla. Pero ainda tin un incertidumbre parse di parti di un grupo di piscado di Aruba.