CITGO Aruba a anuncia inicio fase 2 di inversion

ORANJESTAD - CITGO Aruba a anuncia inicio fase 2 di inversion cuminsando otro luna, cu un inversion di 35 miyon dollar y cu ta genera empleo pa 150 persona adicional. Asina un comunicado emiti pa gobierno di Aruba, ta bisa diamars. Tabata prome minister Evelyn Wever cu a anuncia recientemente cu tabata busca un reunion cu ehecutivonan di CITGO na Merca. Den un reaccion pa NoticiaCla diamars, e mandatario a splica cu e reunion aki tabata cu ehecutivonan local di CITGO, y cu e reunion cu e ehecutivonan Mericano, ta planea pa otro siman. 

INVERSION

Durante e reunion Citgo lo a anuncia cu lo cuminsa cu fase 2 di e inversionnan entrante 1 di september. Ta trata aki di trabaonan di inspeccion pa prepara pa e rehabilitacion di fase 3. Den e fase aki tin un inversion planea di 35 miyon. Esaki sigur ta un bon noticia pa Aruba pa motibo cu unabes esaki wordo realisa, lo crea tambe mas di 150 cupo di empleo adicional di cual mayoria lo ta empleado local, treciendo e total di empleado riba 500.

EMPLEO

Actualmente Citgo tin 390 empleado (incluyendo contratista) y 87.5% di e empleadonan ta local. Gobierno ta satisfecho cu e desaroyo aki, y lo traha hunto cu Citgo pa sigura empleo pa localnan prome.

SANCION

Citgo a indica cu e fase 2 cu lo inicia dia 1 di september lo tin un duracion di 8 pa 10 luna. E financiamento pa e fase aki ta disponible, y no ta cay bou di e sancionnan di Merca contra Venezuela.

CUPO DI TRABOU

Citgo ta indica cu e kier finalisa e proyecto pa asina crea mas cuponan di trabou pa nos hendenen. Na fin di april e fase 2 mester ta kedando cla pa cuminsa cu fase 3 cu ta tambe e ultimo fase. Fase 3 lo tarda 18 luna.

CRITICA DI GOBIERNO

Gobierno di su banda a enfatisa cu e forma con no tabata tin inversion definitivamente no tabata bon pa Aruba y kier mira cu accionnan pronto pa cu trabounan realmente cuminsa na e fase 2. Tin speransa atrobe. Gobierno y Citgo lo sigui reuni regularmente pa sigui e desaroyonan aki di cerca.