A bishita ex Huis van Bewaring pa pone bek den funcion

ORANJESTAD – Manera NoticiaCla a informa mainta caba, un comision a bishita e ex Centro Dakota, tambe conoci como ex Huis van Bewaring, pa por wak e posibilidad pa pone bek den funcion. Esaki den cuadro di e problema di espacio pa aloha personanan violento ilegal te ora cu por deporta nan.

PETICION

Minister di Husticia a haci peticion pa mira kico e posibilidad ta pa por haci uzo di e centro akimirando cu tin cierto di e celnan cu ta den bon condicion ainda. Director di DOW, DIP, personal di CEA, Warda nos Costa, minister di Hustica Andin Bikker, y di infrastructua Otmar Oduber a bay wak e edificio. A mira cu definitivamente ta wak e posibilidad den cuadro di e trabou cu Minister di Husticia ta haciendo actualmente pa percura pa control riba ilegalidad. Banda di e edificio cu nan ta uzando actualmente pa control di ilegalidad y considerando e cantidad di ilegalnan cu ta garando, lo kier mas espacio pa por atende cu esnan cu ta ilegal riba nos Pais.

CALCULA COSTONAN

A yega na e conclusion cu e departamentonan concerni cu ta bay haci calculacion di e costonan pa haci cierto parti di e edificio disponibel atrobe. Banda e uzo pa warda personanan ilegal, a pensa riba espacio cu por wordo uza pa wanta cachonan cu tin doño pero cu no ta cumpliendo cu ley di cacho.

USO PA CACHO

E edificio tin un parti cu ta den mihor condicion cu e otro pa cual e parti menos bon lo por wordo uza pa City Inspector warda e animalnan mientras cu nan doño busca nan bek y nan atende cu nan responsabilidad. Proximamente calculacion lo wordo haci di inversionnan necesario pa haci e luga adecua, Minister Oduber a termina bisando.