A soluciona problema pa por ehecuta crisis plan social

ORANJESTAD – E bottleneck cu tabata stroba ehecucion di e crisis plan social, a keda soluciona. Minister di Asuntonan Social Glenbert Croes a confirma e informacion di NoticiaCla dialuna. Esaki kier men cu porfin por cuminsa implementa e plan aki. Segun Croes, durante un reunion diabierna y ainda awe dialuna, esaki a keda regla, kitando tur ‘red tape’ cu por stroba e ehecucion. “A yega na un acuerdo cu ta bay bin un ‘begrotings fonds’ pa maneha e placa pa e periodo di dos aña di e sociaal crisis plan” Croes a bisa NoticiaCla.

PLAN TRANCA

Algun siman atras e portal aki a puntra e mandatario, kico tin e plan aki tranca cu e no por cuminsa ainda. A confirma cu ‘red tape’ esta burocracia gubernamental tabatin tur cos pega.

BEGROTINGSFONDS

Cu e areglo aki, e placa cu Parlamento a aproba, e por wordo usa. Nos ta na augustus y ainda e fondonan di e crisis plan social no a wordo saca. Si e yega fin di aña y e placa ta riba presupuesto, bo ta perde e placa. Pero si pone riba un begrotingsfonds, e placa ta keda eyden, pe wordo implementa segun e plan. Asina Croes a sigui bisa. A bisa tambe entre ministerio di finanza y esun social, riba un formula cu e mester wordo haci.

BIJZONDER SUBSIDIE OVEREENKOMST

Ta bin un tipo di ‘bijzondere subsidie overeenkomst in het kader van het sociaal crisis plan’, pues un acuerdo particular pa tur e instancianan. Ta firmando e carta dialuna pa bay Parlamento pa e atende den un forma con nan ta sinti nan mes confortable pa duna luz berde pa e por formalisa. Ta papia di un fondo di 12 miyon florin. A crea e impresion segun Croes, cu kier desvia di tur regla y pa evita control di e uso di fondo. Pero tin te hasta un comision cu lo tin cu vigila e uso di e fondo y e progreso di e plan aki.