Holiday Inn tin ok pa 1000 camber extra pa All-Inclusive

ORANJESTAD – Holiday Inn hotel lo haya 1000 camber extra pa usa como All Inclusive. Por lo menos esey ta e peticion haci y concedi na e grupo cu ta doño di e hotel, Grupo Lowenstein. Pero segun e minister di turismo Dangui Oduber, no tin ningun plan concreto cu nan ta bay ehecuta e plan. Mientras cu e ta un decision di gobierno anterior, gobierno actual no por a haci mucho cos sino aproba esaki. Asina minister di turismo Dangui Oduber a confirma pa NoticiaCla dialuna. Segun Oduber, ta gobierno anterior a regla e expansion di camber. “Ora cu nos a drenta gobierno, nos a wordo presenta cu e hecho aki” Oduber a bisa. Ta trata di plannan di 8 aña cu e grupo doño di e hotel, Grupo Lowenstein. Luna pasa e ley nobo di All Inclusive a bay na vigor.

E SITUACION

Segun Oduber, e gobierno anterior tambe a haya e mesun presentacion di e grupo hotelero, y basa riba esey, nan (e tempo ey Minister Benny Sevinger di infrastructura) a bay di acuerdo pa concede esaki. Ta 4 luna pasa cu Oduber a mira e presentacion di e ampliacion di camber. A recorda e grupo cu tin un ley di all inclusive y cu gobierno actual no ta mucho di acuerdo pa amplia e cantidad di camber di hotel y haci esaki cu camber all inclusive. E ley cu recientemente a drenta na vigor, ta limita tur esaki. “Gobierno anterior (ex minister Benny Sevinger) a duna nan tur e toezeggingnan necesario pa bin cu e ampliacion necesario pa e cantidad di cambernan” Oduber a bisa.

OTMAR ODUBER

NoticiaCla por corda cu un di e problemanan cu e tempo ey ex minister di turismo Otmar Oduber tabatin cu el a pone cu e ta retira di e gabinete y como minister, tabata e.o. e decision aki di Sevinger, cu a firma e toezegging, asabiendas cu Oduber tabata trahando riba e ley aki. Como tal e mandatario e tempo ey no a gusta nada y esey tabata un di e motibonan pues pa cual el a retira.