Aki tres siman resultado definitivo investigacion contra Staring ta cla

ORANJESTAD – E resultado preliminar di e investigacion (doorlichting) den dept. di salud (DVG) riba funcionamento di e director Jerry Staring ta conoci. Asina minister di Salud Dangui Oduber a confirma pa NoticiaCla dialuna den un conferencia di prensa. E mandatario sinembargo no ta dispuesto ainda pa divulga esaki mirando cu e investigacion completo no a caba. Mes momento a confirma cu e siman aki ta spera un sentencia den e di dos caso cu Staring a entama contra gobierno (lesa: Minister) pa motibo di ‘toegangontzegging’.

E INVESTIGACION

E mandatario a confirma e di dos caso den corte cu Staring a entama, ora cu e resultado di e prome caso no a duna e resultado desea pa e director. Tabata ora cu Staring a haye confronta cu e ‘toegangontzegging’, cu el a hiba e mandatario corte. Corte a dicta na su fabor, den sentido cu e por bay trabou bek. Sinembargo corte no a bisa cu e mester bay bek como director. Aki ta unda cu gobierno a usa e parti ey y bisa cu e director por wel di bay trabou bek, pero den otro capacidad pa un periodo defini. Staring no a gusta esey y a hiba e mandatario corte bek. Segun Oduber, e siman aki e sentencia ey mester cay.

PAKICO INVESTIGA

E mandatario a confirma cu dentro di dos pa tres siman, e ‘doorlichting’ mester ta completa pa asina por tuma e siguiente decision riba e caso aki. Esey ta nifica cu pa e ora ey, e caso aki lo yega na su final. No ta conoci ki impacto e sentencia nobo aki lo tin riba henter e proceso aki. Si huez dicta na fabor di Staring, si esaki ta impedi e doorlichting di continua of stroba esaki di continua. Pues e siman aki ta bira determinante pa wak con lo sigui.

DOORLICHTING

E doorlichting, segun e mandatario, tabata necesario pa investiga kico tur tabata sosodiendo den e departamento y cu lo a causa asina hopi disgusto entre trahadonan. Aki tin un discrepancia entre e director y tambe e departamento riba e cantidad di persona cu lo a entrega keho, versus e cantidad total di hende cu ta traha bou di e director. Huez a indica e.o. e cantidad di keho no tabata indicativo. Tambe a duna DRH (Departamento di Recurso Humano di gobierno) razon riba su consehonan, cu a pone cu e minister a cuestiona e decision di huez y tambe e imparcialidad di DRH.