Oduber: Esaki ta ultimo aña cu aeropuerto lo sponsor Team Aruba

ORANJESTAD – Mientras cu Team Aruba e fin di siman aki tabata den preparacion pa nan siguiente careda profesional na Merca, na Aruba tin mas asunto cu a surgi pa cu nan sponsorship. Ta corda cu Aruba Tourism Authority a para nan sponsorship per direct e aña aki, e team ta continua cu sponsorship di aeropuerto si. Minister di Turismo y Deporte Dangui Oduber a confirma e sponsorship na NoticiaCla dialuna. Team Aruba ta e ekipo di Ven y Trevor Eman cu ta core auto di careda na Merca cu nomber di Aruba riba e auto. Segun Oduber, esaki ta e ultimo aña cu aeropuerto lo haci esaki.

SPONSOR AAA

Despues cu algun siman pasa e asunto di sponsorship a bin dilanti, unda cu ATA riba orden di minister Oduber, a para sponsorship di varios aña pa Team Aruba, awor a aparece un potret di e auto, cu nomber di aeropuerto di Aruba ariba dje. Y esey a trece cuestionamento necesario pakico aeropuerto si (cu ta cay tambe bou di e mesun minister), y ATA no. Aki Oduber a splica cu e CEO di AAA (James Fazio) a sigura cu esaki lo ta e ultimo aña cu nan lo duna e sponsorship di Team Aruba. “Loke cu mi a compronde di Triple A, e ta un suma masha limita cu si bo compara cu ATA ta casi 15 biaha menos cu loke ATA ta contribui” Oduber a bisa.” Y si ta bon, esaki lo wordo finaliza otro aña”.

PASADO

E mandatario a splica cu aeropuerto (Triple A) den pasado tabata man den man cu ATA. Pues ora cu ATA ta sponsor, AAA ta sponsor. “Y Triple A a yega di contesta nos caba riba esaki, cu momento cu ATA no ta sponsor mas, nan tampoco no ta sponsor mas. Pasobra obviamente nan no ta esun encarga cu e mercadeo di turismo”.