BCA: Mehoracion marginal den finansas publico den prome trimester 2018

ORANJESTAD - Awe Banco Central di Aruba (BCA) ta publica “State of the Economy” pa e prome trimester di 2018. E publicacion aki ta duna un sinopsis di e desaroyonan economico local y internacional di e periodo aki. E puntonan mas importante ta presenta abou, incluyendo un resumen di e indicadornan economico principal.

Den e prome trimester di 2018, e sector turistico un biaha mas tabata e motor principal di e economia Arubano. E mercado Mericano tabata esun mas importante pa e crecemento den bishitante, mescos cu e tabata pa e ultimo cuater trimester. Mientrastanto, turismo crucero tambe a presta fuerte. Cifranan preliminario ta mustra cu e sector turistico a registra un crecemento di 11,2 porciento den entrada. Ademas, e tasa di ocupacion di hotel basa riba un promedio y e entrada hotelero pa camber disponibel a resulta signifcantemente mas halto cu e periodo corespondiente na 2017.

Indicadornan di consumo tabata mixto den e prome trimester di 2018. Entradanan di impuesto a crece significante, relata na mas entrada di benta di negoshi (BBO) y impuesto riba importacion. Tin cu nota cu parti di e crecemento a resulta door di mehoracion den cumplimento y mihor inspecionnan riba importacion. Di otro banda, credito bancario na consumidornan ta mustra un bahada den consumo, cu caida den tur e componentenan di credito, pero primordialmente den prestamo personal. Sentimentonan di consumidor a mehora un poco den e prome trimester di 2018 compara cu e trimester anterior, pero consumidornan a keda pesimista.

Finansas publico a mehora un poco, ilustra pa un caida den e deficit financiero y un tasa di debe stabiel. E deficit mas chikito a resulta for di un crecemento den entrada di gobierno, pa un gran parti atribui na esfuersonan pa mehora cumplimento y cobransa di retrasonan, cu a surpasa e crecemento den gastonan. Debe di gobierno a subi cu Afl. 8,7 miyon den e prome tres luna di 2018. Consecuentemente, e proporcion di debe cu PDB a alcansa na 85,8 porciento na final di e periodo. Apesar di e mehoracion marginal den e posicion financiero di gobierno, gobierno mester traha riba un fortificacion di e fundeshi.

Finalmente, e nivel di reserva di divisa neto a mehora cu 3,3 porciento durante e prome trimester di 2018, permaneciendo riba e normanan critico monitoria pa e Comision di Maneho Monetario (CMM) di BCA. E publicacion completo ta disponibel riba BCA su website (www.cbaruba.org).